O‘zbekiston bosh vaziri Abdulla Aripov 11-oktabr kuni amaliy tashrif bilan Sirdaryo viloyatida bo‘lib, Xovos tumanida bir guruh sirdaryolik tadbirkorlar va xorijiy investorlar bilan uchrashdi. Bu haqda “Daryo”ning hukumatdagi manbasi xabar bermoqda.
Uchrashuvda tijorat banklaridan kredit mablag‘larini olish, elektr energiya ta’minoti, mahsulotlar eksporti va importida yuzaga kelayotgan ayrim muammolar bo‘yicha murojaatlar qabul qilingan. “Tadbirkorlar tomonidan ko‘tarilgan masalalarning aksariyati joyida hal etildi”, — deydi manba.
Qolgan masalalarni hal etish yuzasidan tegishli vazirlik va idoralar rahbarlariga topshiriqlar berilgan. Tadbirkorlarga masala yechimi bo‘yicha yo‘l-yo‘riqlar ko‘rsatilgan.
Prezident Shavkat Mirziyoyev Sirdaryoga fevraldagi tashrifi vaqtida hududni rivojlantirishga qaratilgan qator loyihalarni amalga oshirish yuzasidan topshiriqlar bergan edi. Bosh vazir Aripov viloyatga joriy tashrifi davomida mazkur topshiriqlarning ijrosi bilan ham tanishgan.
Izoh (0)