Ўзбекистон бош вазири Абдулла Арипов 11 октябрь куни амалий ташриф билан Сирдарё вилоятида бўлиб, Ховос туманида бир гуруҳ сирдарёлик тадбиркорлар ва хорижий инвесторлар билан учрашди. Бу ҳақда «Дарё»нинг ҳукуматдаги манбаси хабар бермоқда.
Учрашувда тижорат банкларидан кредит маблағларини олиш, электр энергия таъминоти, маҳсулотлар экспорти ва импортида юзага келаётган айрим муаммолар бўйича мурожаатлар қабул қилинган. «Тадбиркорлар томонидан кўтарилган масалаларнинг аксарияти жойида ҳал этилди», — дейди манба.
Қолган масалаларни ҳал этиш юзасидан тегишли вазирлик ва идоралар раҳбарларига топшириқлар берилган. Тадбиркорларга масала ечими бўйича йўл-йўриқлар кўрсатилган.
Президент Шавкат Мирзиёев Сирдарёга февралдаги ташрифи вақтида ҳудудни ривожлантиришга қаратилган қатор лойиҳаларни амалга ошириш юзасидан топшириқлар берган эди. Бош вазир Арипов вилоятга жорий ташрифи давомида мазкур топшириқларнинг ижроси билан ҳам танишган.
Изоҳ (0)