Prezident Shavkat Mirziyoyev Ashxobodda 11-oktabr kuni bo‘lib o‘tgan Mustaqil Davlatlar Hamdo‘stligi sammitida O‘zbekistonning 2020-yilda MDHga raisligi davomida tashkilot doirasidagi ko‘p tomonlama hamkorlikni kengaytirish va samaradorligini oshirishga ustuvor e’tibor qaratilishini ta’kidladi. Bu haqda Prezident matbuot xizmati xabar bermoqda. 2019-yilda MDHga Turkmaniston raislik qildi.
Hamdo‘stlikni yanada rivojlantirish konsepsiyasi va 2030-yilga qadar davrda iqtisodiy rivojlantirish strategiyasini qabul qilishni jadallashtirish taklif etilgan. Prezident Mirziyoyev 10 yilga mo‘ljallangan Transport va tranzit yo‘laklarini rivojlantirishning ustuvor yo‘nalishlarini va Hududlararo hamkorlik konsepsiyasini ishlab chiqish muhimligini ta’kidlagan.
Savdo-iqtisodiy aloqalarni rivojlantirish, erkin savdo zonasi to‘liq ishlashini ta’minlash, ishlab chiqarish kooperatsiyasini chuqurlashtirish va uchinchi mamlakatlar bozorini o‘zlashtirish, agrar soha, energetika va telekommunikatsiyalar tarmog‘idagi hamkorlikni kengaytirish, ilmiy, innovatsion va ta’lim dasturlarini amalga oshirishga alohida e’tibor qaratilishi ta’kidlangan.
Kelgusi yili O‘zbekistonda birinchi MDH hududlararo forumi bo‘lib o‘tadi, shuningdek, MDH savdo-sanoat palatalari rahbarlari kengashi majlisini o‘tkazish, uning doirasida Hamdo‘stlikning ishbilarmonlik tashabbuslari haftaligini tashkil qilish taklifi bildirilgan. Shuningdek, axborot xavfsizligi, madaniy-gumanitar hamkorlik bo‘yicha ham qator tadbirlar rejalashtirilgan.
Muzokaralar yakunida 2020-yilda MDHga raislik O‘zbekistonga o‘tishi to‘g‘risida qaror, Strategik iqtisodiy hamkorlik to‘g‘risida deklaratsiya, Ikkinchi Jahon urushidagi g‘alabaning 75 yilligi munosabati bilan MDHga a’zo davlatlar rahbarlarining Hamdo‘stlik mamlakatlari xalqlari va xalqaro hamjamiyatga murojaati, 2020—2022-yillarda terrorizm va ekstremizmning boshqa zo‘ravonlik ko‘rinishlariga qarshi kurashish bo‘yicha hamkorlik dasturi va boshqa hujjatlar qabul qilindi.
Sammit doirasida O‘zbekiston Prezidenti Turkmaniston, Moldova, Tojikiston prezidentlari va Armaniston bosh vaziri bilan ikki tomonlama uchrashuvlar o‘tkazgani haqida avval xabar berilgan edi. Shavkat Mirziyoyev shu kuni Toshkentga qaytib keldi.
Izoh (0)