2020-yilning 1-yanvaridan boshlab O‘zbekistonda davlat xizmatchilari ayrim toifalarining mol-mulkini, daromadlari va xarajatlarini deklaratsiyalash tizimini bosqichma-bosqich joriy etish rejalashtirilmoqda. Prezident qarori loyihasi bandlik va mehnat munosabatlari vazirligi tomonidan jamoatchilik muhokamasiga qo‘yildi, deb yozadi “Gazeta.uz”.
Hujjatda qayd etilganidek, u “davlat xizmatchilari o‘rtasida korrupsiyaga qarshi kurashish chora-tadbirlari samaradorligini oshirish, davlat va xo‘jalik boshqaruvi organlari, shuningdek, mahalliy ijro etuvchi hokimiyat organlari mansabdor shaxslari faoliyatida shaffoflikni ta’minlashga qaratilgan”.
Yillik deklaratsiya davlat xizmatchilarining ota-onalari, turmush o‘rtog‘i va farzandlari, shu jumladan, farzandlikka olingan oila a’zolarini qamrab oladi.
Ro‘yxati Prezident tomonidan belgilanadigan mansabdor shaxslarning ayrim toifalari uchun deklaratsiyaga kiritilgan oila a’zolarining kengaytirilgan doirasi belgilanishi mumkin.
Deklaratsiya davlat xizmatchisining elektron raqamli imzosi bilan tasdiqlangan elektron shaklda topshirilishi rejalashtirilmoqda. Deklaratsiyada ko‘rsatilgan ma’lumotlar maxfiy hisoblanadi va himoya qilinadi.
Deklaratsiyadagi davlat xizmatchilarining mol-mulki va daromadlari to‘g‘risidagi alohida ma’lumotlar umumlashtirilgan shaklda ommaviy ravishda e’lon qilinishi mumkin.
Davlat sirlariga taalluqli bo‘lgan tashkilotlarning mansabdor shaxslari davlat siri to‘g‘risidagi qonun hujjatlari qoidalarini hisobga olgan holda daromad va mol-mulk to‘g‘risidagi axborotlarni ma’lumotnoma shaklida taqdim etadi.
Davlat xizmatchilari va ularning oila a’zolari daromadlari, mol-mulki va xarajatlari to‘g‘risidagi ma’lumotlarni o‘z ichiga olgan ma’lumotlar bazasi operatori funksiyasi davlat soliq qo‘mitasiga taqdim etish taklif etiladi.
Bosh prokuratura huzuridagi iqtisodiy jinoyatlarga qarshi kurashish departamentiga deklaratsiyalarda axborotning ishonchliligi va to‘liqligini tanlab nazorat qilish huquqini berish rejalashtirilgan.
Deklaratsiyani davlat xizmatchilarining tegishli lavozimlari bo‘yicha ishga qabul qilishda nomzodlar ham taqdim etishlari kerak.
Daromad, mol-mulk va xarajatlar to‘g‘risidagi deklaratsiyani taqdim etmaslik, yoxud ular tomonidan mol-mulk, daromad va xarajatlar to‘g‘risida to‘liq yoki ishonchsiz ma’lumotlarni taqdim etish, agar bunday ma’lumotlarni taqdim etish majburiy bo‘lsa, mehnat shartnomasini bekor qilish yoki ishga qabul qilishni rad etish uchun asos bo‘lib xizmat qiladi.
1-dekabrga qadar davlat xizmatchilarining mol-mulki, daromadlari va xarajatlari ro‘yxatini tasdiqlash rejalashtirilgan va 1-yanvarga qadar davlat xizmatchilarining mol-mulkini, daromadlarini va xarajatlarini deklaratsiyalashning yagona axborot tizimini joriy etish rejalashtirilgan.
2020-yildan daromad va mol-mulkini kimlar deklaratsiyalashi kerak:
- Oliy Majlis Qonunchilik palatasi spikeri va Senati raisi va ularning o‘rinbosarlari;
- Bosh vazir o‘rinbosarlari, bosh vazir o‘rinbosarlari maslahatchilari;
- Hisob palatasi, Markaziy saylov komissiyasi, Markaziy bank raislari hamda ularning o‘rinbosarlari;
- Vazirlar (davlat qo‘mitalari raislari, respublika davlat boshqaruv organlarining birinchi rahbarlari) va ularning o‘rinbosarlari;
- Davlat boshqaruvi organlarining hududiy boshqarmalari boshliqlari va ularning o‘rinbosarlari;
- Qoraqalpog'iston Respublikasi Vazirlar Kengashi raisi, viloyatlar, tumanlar va shaharlar hokimlari hamda ularning o‘rinbosarlari;
- Prezident ma’muriyati, Qonunchilik palatasi va Senat devoni, Vazirlar Mahkamasi ijro etuvchi apparatining ayrim mansabdor shaxslari;
- Prokuratura organlari xodimlari, davlat xavfsizlik xizmati xodimlari, milliy gvardiya, ichki ishlar organlari xodimlari;
- Ustav fondida davlat ulushi 50 foizdan ortiq bo‘lgan davlat korxonalari va aksiyadorlik kompaniyalari (jamiyatlari) rahbarlari, shuningdek, ularning o‘rinbosarlari.
- Vazirlik va idoralarning tarkibiy bo‘linmalari boshliqlari, shuningdek ularning o‘rinbosarlari;
- Qonunchilik palatasi va Senat apparatlarining tarkibiy bo‘linmalari rahbarlari;
- Viloyat, tuman va shahar hokimlari apparatlarining tarkibiy bo‘linmalari rahbarlari;
- Ustav fondida davlat ulushi 50 foizdan ortiq bo‘lgan davlat korxonalari va aksiyadorlik kompaniyalari (jamiyatlari) tarkibiy bo‘linmalari rahbarlari, shuningdek, ularning o‘rinbosarlari.
- Ishlab chiqarish, texnik va xizmat ko'rsatuvchi xodimlardan tashqari davlat boshqaruvi organlari va mahalliy ijro hokimiyati organlarining boshqa xodimlari;
- Ustav fondida davlat ulushi 50 foizdan ortiq bo‘lgan davlat korxonalari va aksiyadorlik kompaniyalari (jamiyatlari) Markaziy boshqaruv organlarining boshqaruv xodimlari;
- Budjet tashkilotlari rahbarlari va ularning o‘rinbosarlari.
Izoh (0)