Farg‘onada 40 milliard so‘mlik sport majmuasi ishga tushdi

Majmuaning ochilishi munosabati bilan tantanali tadbir tashkil etildi. Unda viloyat va shahar hokimliklari, sport sohasi vakillari va yoshlar ishtirok etdi.

Tadbirda Farg‘ona viloyati hokimi o‘rinbosari F.Qosimov, Farg‘ona shahar hokimi H.Habibiddinov va boshqalar mamlakatda olib borilayotgan keng miqyosli islohotlarda sog‘lom va barkamol yosh avlodni tarbiyalash, jismoniy tarbiya va sportni rivojlantirishga alohida e’tibor qaratilayotganligini ta’kidladi.

“Eng muhimi, yoshlarimiz orasida nufuzli sport musobaqalari, jahon chempionatlarining g‘olib va sovrindorlari yetishib chiqmoqda. Bugungi kunda viloyat sportchilaridan 2020-yil Tokioda bo‘lib o‘tadigan XXXII yozgi Olimpiya va XVI Paralimpiya o‘yinlarida ishtirok etishi kutilayotgan 37 nafar nomzod sportchilar ro‘yxati shakllantirildi”, — deyiladi xabarda.

Farg‘ona shahri markazida yangi ish boshlagan ko‘p tarmoqli zamonaviy sport majmuasi ham yoshlar va sportchilarga katta tuhfa bo‘ldi. Mazkur sport majmuasi 2 yil davomida qurib bitkazildi.

Marg‘ilon shahridagi “426-xo‘jaliklararo ixtisoslashgan ko‘chma mexanizatsiyalashgan kolonna” mas’uliyati cheklangan jamiyati quruvchilari tomonidan bu yerda sportning yakka kurashlari turlariga ixtisoslashtirilgan 4 ta zal va 4 ming o‘rinlik katta arena barpo etildi. Buning uchun Bolalar sportini rivojlantirish jamg‘armasidan 40 milliard 356 million so‘m mablag‘ sarflandi.