Фарғона шаҳрида кўп тармоқли спорт мажмуаси фойдаланишга топширилди, деб
хабар беради ЎзА.
Фото: ЎзАМажмуанинг очилиши муносабати билан тантанали тадбир ташкил этилди. Унда вилоят ва шаҳар ҳокимликлари, спорт соҳаси вакиллари ва ёшлар иштирок этди.
Тадбирда Фарғона вилояти ҳокими ўринбосари Ф.Қосимов, Фарғона шаҳар ҳокими Ҳ.Ҳабибиддинов ва бошқалар мамлакатда олиб борилаётган кенг миқёсли ислоҳотларда соғлом ва баркамол ёш авлодни тарбиялаш, жисмоний тарбия ва спортни ривожлантиришга алоҳида эътибор қаратилаётганлигини таъкидлади.
Фото: ЎзА2019 йилнинг ўзида Фарғона вилоятида 60 дан зиёд спорт масканлари қурилиб, фойдаланишга топширилди. Натижада спорт билан доимий шуғулланадиганлар сони икки баробар кўпайди.
«Энг муҳими, ёшларимиз орасида нуфузли спорт мусобақалари, жаҳон чемпионатларининг ғолиб ва совриндорлари етишиб чиқмоқда. Бугунги кунда вилоят спортчиларидан 2020 йил Токиода бўлиб ўтадиган ХХХII ёзги Олимпия ва XVI Паралимпия ўйинларида иштирок этиши кутилаётган 37 нафар номзод спортчилар рўйхати шакллантирилди», — дейилади хабарда.
Фото: ЎзАФарғона шаҳри марказида янги иш бошлаган кўп тармоқли замонавий спорт мажмуаси ҳам ёшлар ва спортчиларга катта туҳфа бўлди. Мазкур спорт мажмуаси 2 йил давомида қуриб битказилди.
Фото: ЎзАМарғилон шаҳридаги «426-хўжаликлараро ихтисослашган кўчма механизациялашган колонна» масъулияти чекланган жамияти қурувчилари томонидан бу ерда спортнинг якка курашлари турларига ихтисослаштирилган 4 та зал ва 4 минг ўринлик катта арена барпо этилди. Бунинг учун Болалар спортини ривожлантириш жамғармасидан 40 миллиард 356 миллион сўм маблағ сарфланди.
Мажмуа йил давомида спортнинг турли йўналишлари билан шуғулланиш, республика ва йирик халқаро мусобақалар ўтказиш, юксак малакали спортчиларни тайёрлаш ва энг асосийси ёшларимизни оммавий спорт турларига кенг жалб этишга хизмат қилади. Бу ерда эркин кураш, бокс, бадиий гимастика каби спорт тўгаракларида ёшлар мунтазам шуғулланишни бошлади.
Изоҳ (0)