Toshkent viloyati, Parkent tumanidagi “Zarkent bobo” ziyoratgohida qabr tavof qilinayotgani, ustunlar o‘pilayotgani, zinalarga bosh qo‘yib, sajda etilayotgani tasvirga olingan video ijtimoiy tarmoqlarda tarqalgan edi.
O‘zbekiston musulmonlari idorasi Toshkent viloyati Parkent tumani imom-xatiblari tomonidan ziyoratgohda kuzatilgan islom diniga zid amallarni bartaraf etish choralari ko‘rilgani va u yerdagi holat doimiy nazoratga olinganini ma’lum qildi.
Shuningdek, diniy idora tashabbusi bilan islom dinida bayon etilgan ziyorat odoblari aks etgan peshlavhalarni idora tasarrufida bo‘lmagan qadamjolarga ham joylashtirish bo‘yicha sa’y-harakatlar boshlangani aytildi.
“O‘zbekiston musulmonlari idorasi yana bir bor shu kabi o‘z tasarrufida bo‘lmagan ziyoratgohlarning mas’ullarini mana shunday ko‘ngilsiz holatlar yuzaga kelishining oldini olish, ziyorat odoblarini tushuntirish borasida hamkorlikka doim tayyor ekanini ma’lum qiladi”, — deyiladi xabarda.
Izoh (0)