Milliy gvardiya bir nechta sportchini rag‘batlantirdi

6—22-sentabr kunlari Rossiyaning Yekaterinburg shahrida bo‘lib o‘tgan boks bo‘yicha Jahon chempionatida sovrindorga aylangan bir nechta bokschilar O‘zbekiston Respublikasi Milliy gvardiyasi qo‘mondonligi tomonidan rag‘batlantirildi.

O‘zbekiston Respublikasi Milliy gvardiyasi harbiy xizmatchilari Bahodir Jalolov va Bobo-Usmon Boturov, bir qator xalqaro musobaqalar g‘olibi Murodjon Ahmadaliyevga navbatdagi harbiy unvon hamda esdalik sovg‘alari topshirildi.

Qozog‘iston poytaxti Nur-Sulton shahrida bo‘lib o‘tgan yunon-rum kurashi bo‘yicha Jahon saralash musobaqasida Tokio—2020 Olimpiadasi yo‘llanmasiga ega bo‘lgan Elmurat Tasmuradov ham taqdirlandi.

Shuningdek, bokschilarni tayyorlashda jonbozlik ko‘rsatib kelayotgan murabbiy Milliy gvardiya Ixtisoslashtirilgan o‘quv markazi katta o‘qituvchisi Elshod Rasulov ham Milliy gvardiya qo‘mondonining esdalik sovg‘alari bilan taqdirlandi.

Eslatib o‘tamiz, O‘zbekistonlik bokschilar Jahon chempionatida 3 ta oltin, 1 ta kumush va 1 ta bronza medal bilan umumjamoa hisobida birinchi o‘rinni qo‘lga kiritgandi.