Facebook’dagi “Xalq fikri” guruhida Andijon viloyatining Baliqchi tumanida yashovchi ayollar to‘lanmagan kompensatsiya sabab ochlik e’lon qilgani haqida qilgan videomurojaat joylashtirilgandi.
https://www.facebook.com/Sherzod.Qosimov.1234/videos/521596388616888/
Videoda tumandagi katta avtomobil yo‘liga turib olgan “Ochlik e’lon qilamiz” yozuvlarini ko‘targan sakkiz ayol, bir erkak va ikki bolakay tasvirlangan, norozilik bildirayotgan ayollar: “Biz Prezident bilan gaplashamiz. Bugundan boshlab ochlik e’lon qilamiz va ko‘chada tunaymiz. Kerak bo‘lsa asfaltga yotib olib, mashina ostiga o‘zimizni tashlaymiz. Hammamiz jonimizdan to‘ydik. Va’dalardan zerikdik, Baliqchi tumani hokimligi bizni bir yildan beri aldab kelmoqda. Kompensatsiya pulimizni undirib berishsin”, — deb o‘z gaplarini bayon qilgandi.
Yig‘ilganlar nomidan asosiy norozilikni bildirgan onaxonning so‘zlariga ko‘ra, tumanda odamlarning uylari buzilgan va hokimlik bir yildan beri ularga kompensatsiya to‘lamay kelgan. Shuningdek, bankdan kelgan mutasaddilar odamlarni urib-so‘kib, uylaridan haydab chiqarishga uringan.
Holatni o‘rganish maqsadida “Daryo” muxbiri Baliqchi tumanida bo‘lib, jurnalistik surishtiruv o‘tkazdi.
“Haqiqatdan ham bormagan joyimiz, kirmagan eshigimiz qolmadi. Eshitadigan insonning o‘zi bo‘lmadi. Hatto Bosh prokuraturagacha bordik. Har gal viloyat hokimi o‘tkazgan sayyor qabullarga borganimizda tuman hokimligidagilar muammoni hal etishga va’da berib, qaytarib yuborishardi. Lekin va’da bajarilmasdi. Bu yoqda esa MIB va bankdagilar kelib, kreditning qarzini to‘la deb turib olishardi. Alam qiladigani, yashab turgan uyimizdan chiqib ketishimizni talab qilishgan. To‘g‘risi, bunday yashashdan bezib ketganimizdan shu ishni qilganmiz. Tuman hokimiga rahmat, o‘sha kunning o‘zida oldimizga kelib, har birimiz bilan alohida suhbatlashdi. Ayrim qo‘shnilarimizning hujjat ishlari yakuni yetishiga barchaga kompensatsiya to‘lovlari to‘lanishini aytdi. Hech qancha o‘tmasdan va’dasini ustidan chiqdi. Endi e’tirozimiz yo‘q”, — deydi Muborak Muhiddinova.
Fuqaro Abdurahmon Sirojiddinovning aytishicha, videoni joriy yil 29-iyul kuni 170 dan ortiq murojaatiga bepisandlik bilan qaragan mutasaddi tashkilotlarga ko‘rsatish maqsadida o‘zlari istiqomat qilgan ko‘cha boshida olgan.
— Video qo‘shnilarimizdan tashqari boshqa hech kimga o‘tkazib berilmagan, — deydi u. — Saqlashdan maqsad qandaydir muammo chiqsa, zarurat tug‘ilganda foydalanish bo‘lgan. Tarqalishiga keladigan bo‘lsak, ijtimoiy tarmoqqa kim joylashtirganini ayta olmayman. Tarqatgan odam bilan suhbatlashganimizda tanishlari unga “hokimiyat seni aldayapti, ertaga uysiz qolishing mumkin” degan fikrni bergani ma’lum bo‘ldi. Bundan kayfiyati tushib ketgan, shuningdek, yugur-yugurlardan charchagan qo‘shnimiz shoshqaloqlik qilib, jo‘natib yuborgan. Niyatimiz muammoni ommaga oshkor qilish bo‘lmagan. Chunki masala bundan salkam ikki oy avval yechilgan.
Baliqchi tuman hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari Sarvar Mitillayevning ma’lum qilishicha, tumanda aholini ijtimoiy muammolarini o‘rganish bo‘yicha tuzilgan respublika va viloyat ishchi guruhi tomonidan 2018-yilning may-iyun oylari davomida Chinobod shaharchasi, “Iftixor” mahallasida joylashgan 65-umumiy uyda yashovchi fuqarolardan uy eskirganligi sababli qaytadan qurish uchun amaliy yordam so‘rab murojaat qilingan.
Umumiy maydoni 25 sotix bo‘lgan ushbu uylarni o‘rganish davrida 1930-yilda xom g‘ishtdan qurilganligi, haqiqatan ham yashash uchun yaroqsiz ahvolga kelib qolganligi, xususan, sanitar-gigiyenik, yong‘in xavfsizligi talablariga to‘liq javob bermasligi aniqlangan.
Shundan so‘ng 2018-yilning 3-iyun kuni tuman hokimligi va fuqarolar ishtirokida yig‘ilish o‘tkazilgan. Unda eski uylar o‘rnida zamonaviy uy-joy qurilib, o‘z egalariga topshirilishi belgilangan.
Shunga asoslanib, Baliqchi tumani hokimining 2760-Q sonli qarori qabul qilingan. Unda qator me’yoriy hujjatlar asos qilinib, yashash uchun yaroqsiz bo‘lgan xonadonlarning mulkdorlariga “Go‘ravon” MFY hududida qurilishi rejalashtirilayotgan uylardan tekinga berish mo‘ljallangan.
Kelishuvga ko‘ra, xonadon egalarining o‘zlari tomonidan binolar buzilib, undan chiqqan qurilish materiallari olib chiqib ketilgan.
Buzish ishlari yakunlanganidan so‘ng qolgan yer maydoni tuman hokimining 2018-yil 26-avgustdagi qarori bilan “Qishloq qurilish invest” Andijon filialiga yangilangan namunaviy loyihalar bo‘yicha ko‘p qavatli arzon uy-joylar qurish uchun vaqtincha foydalanish huquqi bilan ajratib berilgan. Pudrat shartnomasiga ko‘ra, o‘tgan yilning dekabr oyida yuqorida ko‘rsatilgan manzilda “Ixtisoslashgan Shahrixon qurilish” xususiy korxonasi tomonidan bir, ikki va uch xonali 16 xonadondan iborat 2 qavatli hamda ikkita 2 sotixli namunali uy-joylar qurib bitkazilgan.Xonadonlar sobiq umumiy uyda yashagan fuqarolarga “Qishloq qurilish bank” ATB Andijon mintaqaviy filiali tomonidan berilgan kreditlar asosida sotilgan.
Kredit shartnomasiga ko‘ra, xonadonlar uchun dastlabki badal to‘lovi sifatida umumiy summaning 10 foiz qismi fuqarolarning o‘zlari tomonidan, fuqarolar M.Matqobulova, A.Abdullayev, U.Muhitdinova hamda R.Lashmanovaga esa homiylik hisobidan to‘langan.
Tuman hokimligi huquqshunosi Abdumuxtor Turobjonovga ko‘ra, mazkur vaziyat tuman prokuraturasi tomonidan viloyat yer-mulk kadastri davlat korxonasi va boshqa tashkilotlardan tegishli mutaxassislar jalb etilib o‘rganilgan va natijasiga asosan, yo‘l qo‘yilgan qonun buzilish holatlarini bartaraf etish haqida taqdimnoma kiritilgan.
O‘rganish davomida sobiq 65-umumiy uyda istiqomat qilgan 4 nafar fuqaroning 5 ta xonadonga nisbatan o‘zlarining qonuniy egaligida ekanligini tasdiqlovchi hujjatlari mavjudligi aniqlangan. Qolgan 11 nafar fuqaroga o‘zlari istiqomat qilib kelgan xonadonlarga nisbatan egalik huquqini tasdiqlovchi hujjatlarni taqdim etishlari lozimligi tushuntirilgan. Videodagi ayollarning 7 nafari, ya’ni M.Muhitdinova, A.Muhitdinov, M.Ahmedova, M.Abdullayeva, M.Isaqova, R.Rasmanova va Yo.Yusupova buzilgan xonadonlari uchun tovon puli talab qilgan bo‘lsa-da, egalik huquqini tasdiqlovchi hech qanday huquqiy hujjat taqdim etmagan.
— Uyi buzilgan fuqarorlarning aksariyati tuman hokimligi tomonidan “Go‘ravon” mahallasidan tekinga berilayotgan uylarni rad qilib, evaziga hozirda o‘zlari kredit shartnomasi asosida sotib olgan uylari uchun to‘lovlarni to‘lab berishni so‘rashgan, — deydi Abdumuxtor Turobjonov. — Shu sababli, tuman hokimining 2019- yil 7-sentabr kuni farmoyishi qabul qilinib, unga ko‘ra mazkur uylar uchun bank muassasasiga to‘lovlar bosqichma-bosqich to‘lab berilishi belgilangan.
Abdurahmon Sirojiddinov video ijtimoiy tarmoqlarga joylashtirilgandan so‘ng qoldirilayotgan izohlarga noroziligini bildirdi. Bu haqda o‘zining fikrlarini bayon qildi:
— Ijtimoiy tarmoqlardagi izohlarda bizni noshukurlikda ayblashayotganiga guvoh bo‘lmoqdamiz. “Ayrimlar qonunlarga qarshilik ko‘rsatishmoqda”, degan fikrlarni ham o‘qimoqdamiz. Yurtdoshlarimizdan videoga diqqat bilan quloq tutishlarini iltimos qilamiz. Biz tomondan Prezident siyosatiga, viloyat hokimligiga hech qanday qarshilik bo‘lmagan, aksincha, dardimizga quloq tutishlarini, yordam berishlarini so‘raganmiz, xolos. Bundan tashqari, faqat bizni ayblashlari ham noo‘rinligini aytib, murojaatlarimizni eshitmagan, o‘z vaqtida javob bermagan mutasaddilarning ham aybi borligini eslatib o‘tmoqchiman. Viloyat va tuman hokimi muammoyimizni ikki oy avval yechib berganini ham alohida qayd etmoqchiman.
Izoh (0)