Facebook’даги «Халқ фикри» гуруҳида Андижон вилоятининг Балиқчи туманида яшовчи аёллар тўланмаган компенсация сабаб очлик эълон қилгани ҳақида қилган видеомурожаат жойлаштирилганди.
https://www.facebook.com/Sherzod.Қосимов.1234/видеос/521596388616888/
Видеода тумандаги катта автомобиль йўлига туриб олган «Очлик эълон қиламиз» ёзувларини кўтарган саккиз аёл, бир эркак ва икки болакай тасвирланган, норозилик билдираётган аёллар: «Биз Президент билан гаплашамиз. Бугундан бошлаб очлик эълон қиламиз ва кўчада тунаймиз. Керак бўлса асфалтга ётиб олиб, машина остига ўзимизни ташлаймиз. Ҳаммамиз жонимиздан тўйдик. Ваъдалардан зерикдик, Балиқчи тумани ҳокимлиги бизни бир йилдан бери алдаб келмоқда. Компенсация пулимизни ундириб беришсин», — деб ўз гапларини баён қилганди.
Йиғилганлар номидан асосий норозиликни билдирган онахоннинг сўзларига кўра, туманда одамларнинг уйлари бузилган ва ҳокимлик бир йилдан бери уларга компенсация тўламай келган. Шунингдек, банкдан келган мутасаддилар одамларни уриб-сўкиб, уйларидан ҳайдаб чиқаришга уринган.
Ҳолатни ўрганиш мақсадида «Дарё» мухбири Балиқчи туманида бўлиб, журналистик суриштирув ўтказди.
«Ҳақиқатдан ҳам бормаган жойимиз, кирмаган эшигимиз қолмади. Эшитадиган инсоннинг ўзи бўлмади. Ҳатто Бош прокуратурагача бордик. Ҳар гал вилоят ҳокими ўтказган сайёр қабулларга борганимизда туман ҳокимлигидагилар муаммони ҳал этишга ваъда бериб, қайтариб юборишарди. Лекин ваъда бажарилмасди. Бу ёқда эса МИБ ва банкдагилар келиб, кредитнинг қарзини тўла деб туриб олишарди. Алам қиладигани, яшаб турган уйимиздан чиқиб кетишимизни талаб қилишган. Тўғриси, бундай яшашдан безиб кетганимиздан шу ишни қилганмиз. Туман ҳокимига раҳмат, ўша куннинг ўзида олдимизга келиб, ҳар биримиз билан алоҳида суҳбатлашди. Айрим қўшниларимизнинг ҳужжат ишлари якуни етишига барчага компенсация тўловлари тўланишини айтди. Ҳеч қанча ўтмасдан ваъдасини устидан чиқди. Энди эътирозимиз йўқ», — дейди Муборак Муҳиддинова.
Фуқаро Абдураҳмон Сирожиддиновнинг айтишича, видеони жорий йил 29 июль куни 170 дан ортиқ мурожаатига беписандлик билан қараган мутасадди ташкилотларга кўрсатиш мақсадида ўзлари истиқомат қилган кўча бошида олган.
— Видео қўшниларимиздан ташқари бошқа ҳеч кимга ўтказиб берилмаган, — дейди у. — Сақлашдан мақсад қандайдир муаммо чиқса, зарурат туғилганда фойдаланиш бўлган. Тарқалишига келадиган бўлсак, ижтимоий тармоққа ким жойлаштирганини айта олмайман. Тарқатган одам билан суҳбатлашганимизда танишлари унга «ҳокимият сени алдаяпти, эртага уйсиз қолишинг мумкин» деган фикрни бергани маълум бўлди. Бундан кайфияти тушиб кетган, шунингдек, югур-югурлардан чарчаган қўшнимиз шошқалоқлик қилиб, жўнатиб юборган. Ниятимиз муаммони оммага ошкор қилиш бўлмаган. Чунки масала бундан салкам икки ой аввал ечилган.
Балиқчи туман ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Сарвар Митиллаевнинг маълум қилишича, туманда аҳолини ижтимоий муаммоларини ўрганиш бўйича тузилган республика ва вилоят ишчи гуруҳи томонидан 2018 йилнинг май июнь ойлари давомида Чинобод шаҳарчаси, «Ифтихор» маҳалласида жойлашган 65-умумий уйда яшовчи фуқаролардан уй эскирганлиги сабабли қайтадан қуриш учун амалий ёрдам сўраб мурожаат қилинган.
Умумий майдони 25 сотих бўлган ушбу уйларни ўрганиш даврида 1930 йилда хом ғиштдан қурилганлиги, ҳақиқатан ҳам яшаш учун яроқсиз аҳволга келиб қолганлиги, хусусан, санитар-гигиеник, ёнғин хавфсизлиги талабларига тўлиқ жавоб бермаслиги аниқланган.
Шундан сўнг 2018 йилнинг 3 июнь куни туман ҳокимлиги ва фуқаролар иштирокида йиғилиш ўтказилган. Унда эски уйлар ўрнида замонавий уй-жой қурилиб, ўз эгаларига топширилиши белгиланган.
Шунга асосланиб, Балиқчи тумани ҳокимининг 2760-Қ сонли қарори қабул қилинган. Унда қатор меъёрий ҳужжатлар асос қилиниб, яшаш учун яроқсиз бўлган хонадонларнинг мулкдорларига «Гўравон» МФЙ ҳудудида қурилиши режалаштирилаётган уйлардан текинга бериш мўлжалланган.
Келишувга кўра, хонадон эгаларининг ўзлари томонидан бинолар бузилиб, ундан чиққан қурилиш материаллари олиб чиқиб кетилган.
Бузиш ишлари якунланганидан сўнг қолган ер майдони туман ҳокимининг 2018 йил 26 августдаги қарори билан «Қишлоқ қурилиш инвест» Андижон филиалига янгиланган намунавий лойиҳалар бўйича кўп қаватли арзон уй-жойлар қуриш учун вақтинча фойдаланиш ҳуқуқи билан ажратиб берилган. Пудрат шартномасига кўра, ўтган йилнинг декабрь ойида юқорида кўрсатилган манзилда «Ихтисослашган Шаҳрихон қурилиш» хусусий корхонаси томонидан бир, икки ва уч хонали 16 хонадондан иборат 2 қаватли ҳамда иккита 2 сотихли намунали уй-жойлар қуриб битказилган.Хонадонлар собиқ умумий уйда яшаган фуқароларга «Қишлоқ қурилиш банк» АТБ Андижон минтақавий филиали томонидан берилган кредитлар асосида сотилган.
Кредит шартномасига кўра, хонадонлар учун дастлабки бадал тўлови сифатида умумий сумманинг 10 фоиз қисми фуқароларнинг ўзлари томонидан, фуқаролар М.Матқобулова, А.Абдуллаев, У.Муҳитдинова ҳамда Р.Лашмановага эса ҳомийлик ҳисобидан тўланган.
Туман ҳокимлиги ҳуқуқшуноси Абдумухтор Туробжоновга кўра, мазкур вазият туман прокуратураси томонидан вилоят ер-мулк кадастри давлат корхонаси ва бошқа ташкилотлардан тегишли мутахассислар жалб этилиб ўрганилган ва натижасига асосан, йўл қўйилган қонун бузилиш ҳолатларини бартараф этиш ҳақида тақдимнома киритилган.
Ўрганиш давомида собиқ 65-умумий уйда истиқомат қилган 4 нафар фуқаронинг 5 та хонадонга нисбатан ўзларининг қонуний эгалигида эканлигини тасдиқловчи ҳужжатлари мавжудлиги аниқланган. Қолган 11 нафар фуқарога ўзлари истиқомат қилиб келган хонадонларга нисбатан эгалик ҳуқуқини тасдиқловчи ҳужжатларни тақдим этишлари лозимлиги тушунтирилган. Видеодаги аёлларнинг 7 нафари, яъни М.Муҳитдинова, А.Муҳитдинов, М.Аҳмедова, М.Абдуллаева, М.Исақова, Р.Расманова ва Ё.Юсупова бузилган хонадонлари учун товон пули талаб қилган бўлса-да, эгалик ҳуқуқини тасдиқловчи ҳеч қандай ҳуқуқий ҳужжат тақдим этмаган.
— Уйи бузилган фуқарорларнинг аксарияти туман ҳокимлиги томонидан «Гўравон» маҳалласидан текинга берилаётган уйларни рад қилиб, эвазига ҳозирда ўзлари кредит шартномаси асосида сотиб олган уйлари учун тўловларни тўлаб беришни сўрашган, — дейди Абдумухтор Туробжонов. — Шу сабабли, туман ҳокимининг 2019- йил 7 сентябрь куни фармойиши қабул қилиниб, унга кўра мазкур уйлар учун банк муассасасига тўловлар босқичма-босқич тўлаб берилиши белгиланган.
Абдураҳмон Сирожиддинов видео ижтимоий тармоқларга жойлаштирилгандан сўнг қолдирилаётган изоҳларга норозилигини билдирди. Бу ҳақда ўзининг фикрларини баён қилди:
— Ижтимоий тармоқлардаги изоҳларда бизни ношукурликда айблашаётганига гувоҳ бўлмоқдамиз. «Айримлар қонунларга қаршилик кўрсатишмоқда», деган фикрларни ҳам ўқимоқдамиз. Юртдошларимиздан видеога диққат билан қулоқ тутишларини илтимос қиламиз. Биз томондан Президент сиёсатига, вилоят ҳокимлигига ҳеч қандай қаршилик бўлмаган, аксинча, дардимизга қулоқ тутишларини, ёрдам беришларини сўраганмиз, холос. Бундан ташқари, фақат бизни айблашлари ҳам ноўринлигини айтиб, мурожаатларимизни эшитмаган, ўз вақтида жавоб бермаган мутасаддиларнинг ҳам айби борлигини эслатиб ўтмоқчиман. Вилоят ва туман ҳокими муаммойимизни икки ой аввал ечиб берганини ҳам алоҳида қайд этмоқчиман.
Изоҳ (0)