Zimbabvening sobiq prezidenti Robert Mugabe 6-sentabr kuni 95 yoshda vafot etgani haqida avvalroq xabar berilgandi. “Zimbabve Afrika milliy birligi — Vatanparvarlik fronti” partiyasi Robert Mugabeni mamlakatning milliy qahramoni unvoni bilan taqdirladi, deb xabar beradi “TASS”.
Amaldagi prezidenti Emmerson Mnangagva ushbu qaror haqida Xararedagi hukumat binosi oldida qilgan chiqishi vaqtida e’lon qildi. “Robert Mugabe Afrikaning mustamlakachilik zulmidan ozod bo‘lishiga erishgan jangchilar avlodining vakili. Buni Zimbabve va Afrikaning boshqa xalqlari hech qachon unutmaydi”, — deydi Mnangagva.
Shuningdek, prezidentning aytishicha, Mugabening jasadi Singapurdan qaytarib olib kelinmagunicha motam davom etadi.
Robert Mugabe 1980-yili, Zimbabve mustaqillikka erishganda bosh vazir bo‘lgandi. 7 yildan so‘ng bu lavozimni bekor qilib, o‘zini prezident etib tayinlaydi. Mugabe davlat rahbarligiga olti marotaba qayta saylangan va mamlakatni salkam 40 yil boshqargan. 2017-yildagi davlat to‘ntarilishidan so‘ng iste’foga chiqishga majbur bo‘lgan.
Izoh (0)