Ijtimoiy tarmoqlarda Andijon shahridagi 4-oilaviy poliklinikaning yerto‘la qismida sanitariya talablariga zid xonalarda aholiga tibbiy yordam ko‘rsatilayotgani haqida videolavha tarqaldi. Andijon viloyati sog‘liqni saqlash boshqarmasi ushbu holat yuzasidan o‘rganish o‘tkazdi. Bu haqda Sog‘liqni saqlash vazirligi axborot xizmati “Daryo”ga xabar berdi.
“Bugungi kunda Andijon shahridagi 4-oilaviy poliklinikada bosqichma-bosqich ta’mirlash ishlari olib borilyapti. Binoning yuqori qavatlarida rejali ta’mirlash ishlari tufayli oilaviy poliklinikaning laboratoriya tahlil xonasi haqiqatan ham qisqa muddat yerto‘laga joylashtirildi. Hozirgi kunda laboratoriya binoning ikkinchi qavatida o‘z faoliyatini talab darajasida davom ettirmoqda.
Shuni aytish joizki, mazkur oilaviy poliklinika binosi ikki qavat va yerto‘ladan iborat. Yuqorida qayd etilganidek, poliklinikada bosqichma-bosqich rekonstruksiya ishlari olib borilyapti. Jumladan, 2015-yilda bino tomi zamonaviy profnastil bilan qoplandi, 2017-yilda issiqlik tizimi to‘liq ta’mirlandi.
Joriy yilda esa sovuq suv va kanalizatsiya tizimi ham ta’mirdan chiqarildi. Ayni paytda binoning yerto‘la qismida ta’mirlash ishlari ketyapti. Bundan tashqari, mazkur oilaviy poliklinika 2021-yilda investitsiya dasturiga kiritilib, tubdan rekonstruksiya qilinishi rejalashtirilgan.
Eslatib o‘tamiz, ushbu poliklinika bugungi kunda o‘ttiz ming nafarga yaqin aholiga xizmat ko‘rsatyapti. Kuniga 250 qatnovga mo‘ljallangan tibbiyot muassasasida tibbiyotning o‘nta yo‘nalishi bo‘yicha tor mutaxassislar, 12 nafar umumiy amaliyot shifokori va o‘ttiz nafardan ko‘proq hamshiralar aholiga malakali tibbiy yordam ko‘rsatmoqda.
Oilaviy poliklinika EKG, UTT, flyuorograf kabi zamonaviy tibbiy asbob-uskunalar bilan jihozlangan, biokimyoviy laboratoriya tahlil xonasi, fizioterapiya va sterilizatsiya xonalari faoliyat yurityapti”, — deyiladi vazirlik xabarida.
Izoh (0)