Buxoroliklar avtomobillarini “tonirovka” qildirish uchun 28 kunda 2 mlrd so‘mdan ortiq pul sarfladi

Buxoro viloyati IIB YHXB avgust oyida “tonirovka” uchun qancha ruxsatnoma berilgani haqidagi statistikani taqdim etdi.

2019-yil 30-avgust kuni holatida (ruxsat berish 2-avgustda boshlangan) jami 677 ta transport vositasiga oynalarini “qoraytirishga” ruxsatnoma berilgan. Shundan 587 tasi 1-toifa (orqa yon oynalari), 90 tasi 2-toifa (old va orqa yon oynalari, ya’ni to‘liq “tonirovka”) bo‘yicha ruxsatnomaga ega bo‘lgan.

Xususan, 535 jismoniy shaxsga tegishli avtotransport vositalariga: 475 ta 1-toifa va 60 ta 2-toifa uchun;142 yuridik shaxsga tegishli avtotransport vositalariga: 112 ta 1-toifa va 30 ta 2-toifa uchun ruxsatnoma berilgan.

Ushbu ruxsatnomalar uchun 2 312 510 000 (ikki milliard uch yuz o‘n ikki million besh yuz o‘n ming) so‘m miqdordagi to‘lovlar undirilgan.