Sog‘liqni saqlash vazirligi “Daryo”da e’lon qilingan “Qashqadaryoda asab-ruhiy kasalliklar shifoxonasi sirini fosh qilishga uringan jurnalistga kuch ishlatilgani aytilmoqda. Shifoxona qanday sirni yashirmoqda?” sarlavhali maqola yuzasidan o‘rganish o‘tkazdi. O‘rganish natijalari vazirlik axborot xizmati tomonidan “Daryo”ga taqdim etildi.
“O‘rganish jarayonida dispanser ishchi-xodimlari O‘zbekiston Respublikasining ‘Psixiatriya yordami to‘g‘risida’gi qonunning 7, 11-moddalari hamda Sog‘liqni saqlash vazirligining ‘Psixiatriya shifoxonalari nizomi’ning 54-bandiga asosan harakat qilganliklari aniqlangan.
Jumladan, mazkur qonunning 7-moddasiga ko‘ra, ruhiy holati buzilgan shaxslarning qator huquqlari bilan birga, tibbiy vosita va usullarni sinash, ilmiy tadqiqotlar yoki o‘quv jarayoni obyekti tariqasida foydalanilishga, foto, video yoki kino suratga olinishga oldindan rozilik berish va istalgan bosqichda undan voz kechish huquqi qat’iy belgilab qo‘yilgan.
Dispanserda tungi navbatchilikda turgan xodimlar qonunchilikdagi ushbu me’yorlarni eslatishiga qaramasdan, jurnalist navbatchi xodimlarga bo‘ysunmaganligi, turli so‘zlar bilan shifokorlarni haqorat qilganligi yuzasidan Qarshi shahar ichki ishlar bo‘limiga bildirishnoma taqdim etgan.
Hozirda ushbu holat yuzasidan ichki ishlar organlari tomonidan tergovga qadar tekshiruv ishlari olib borilmoqda. Vaziyat oydinlashgach batafsil ma’lumot beriladi”, — deyiladi vazirlik bayonotida.
Izoh (0)