Ижтимоий тармоқларда Андижон шаҳридаги 4-оилавий поликлиниканинг ертўла қисмида санитария талабларига зид хоналарда аҳолига тиббий ёрдам кўрсатилаётгани ҳақида видеолавҳа тарқалди. Андижон вилояти соғлиқни сақлаш бошқармаси ушбу ҳолат юзасидан ўрганиш ўтказди. Бу ҳақда Соғлиқни сақлаш вазирлиги ахборот хизмати «Дарё»га хабар берди.
«Бугунги кунда Андижон шаҳридаги 4-оилавий поликлиникада босқичма-босқич таъмирлаш ишлари олиб бориляпти. Бинонинг юқори қаватларида режали таъмирлаш ишлари туфайли оилавий поликлиниканинг лаборатория таҳлил хонаси ҳақиқатан ҳам қисқа муддат ертўлага жойлаштирилди. Ҳозирги кунда лаборатория бинонинг иккинчи қаватида ўз фаолиятини талаб даражасида давом эттирмоқда.
Шуни айтиш жоизки, мазкур оилавий поликлиника биноси икки қават ва ертўладан иборат. Юқорида қайд этилганидек, поликлиникада босқичма-босқич реконструкция ишлари олиб бориляпти. Жумладан, 2015 йилда бино томи замонавий профнастил билан қопланди, 2017 йилда иссиқлик тизими тўлиқ таъмирланди.
Жорий йилда эса совуқ сув ва канализация тизими ҳам таъмирдан чиқарилди. Айни пайтда бинонинг ертўла қисмида таъмирлаш ишлари кетяпти. Бундан ташқари, мазкур оилавий поликлиника 2021 йилда инвестиция дастурига киритилиб, тубдан реконструкция қилиниши режалаштирилган.
Эслатиб ўтамиз, ушбу поликлиника бугунги кунда ўттиз минг нафарга яқин аҳолига хизмат кўрсатяпти. Кунига 250 қатновга мўлжалланган тиббиёт муассасасида тиббиётнинг ўнта йўналиши бўйича тор мутахассислар, 12 нафар умумий амалиёт шифокори ва ўттиз нафардан кўпроқ ҳамширалар аҳолига малакали тиббий ёрдам кўрсатмоқда.
Оилавий поликлиника ЭКГ, УТТ, флюорограф каби замонавий тиббий асбоб-ускуналар билан жиҳозланган, биокимёвий лаборатория таҳлил хонаси, физиотерапия ва стерилизация хоналари фаолият юритяпти», — дейилади вазирлик хабарида.
Изоҳ (0)