“O‘zenergoinspeksiya”ning Jizzax hududiy bo‘limi va MIB Jizzax shahar boshqarmasining qo‘shma ish rejasiga asosan iste’molchilarning elektr energiyasidan foydalanish qoidalari bo‘yicha o‘rganishlar olib borilganda elektr energiyasini o‘g‘irlashning “antiqa” usuli aniqlandi, deb xabar bermoqda Energetika vazirligi.
O‘rganishlar mobaynida Jizzax shahridagi Original Food Invest MChJga qarashli umumiy ovqatlanish shoxobchasida o‘rnatilgan Mercury 230 ART elektr hisoblagichidagi ishlab chiqaruvchi zavodning golografik muhriga ziyon yetkazilganligi shubha uyg‘otgan.
Bu holatga aniqlik kiritish maqsadida, ushbu turdagi elektr hisoblagichlar ishlab chiqaruvchining O‘zbekistondagi vakili bo‘lgan Neotech Group MChJga murojaat qilingan.
Elektr hisoblagichning standart talablariga mosligi tekshirilganda elektr energiyasini o‘g‘irlashning “antiqa” turi aniqlangan. Neotech Group MChJning bergan xulosasiga ko‘ra, Original Food Invest MChJning elektr hisoblagichdagi zavod tomonidan o‘rnatilgan golografik muhr va kafolat yorlig‘i buzilganligi, eng muhimi — elektr hisoblagichning ichki xotira bloki almashtirib, boshqa hisoblagichning ichki xotira bloki o‘rnatilganligi aniqlangan.
Ushbu holat bo‘yicha Jizzax shahri Majburiy Ijro Byurosi tomonidan qoidabuzarlik dalolatnomasi rasmiylashtirilgan va iste’molchi elektr tarmog‘idan uzilgan.
“O‘zenergoinspeksiya”ning Jizzax hududiy bo‘limi mutaxassisi xulosasi asosida, iste’mol qilingan elektr energiyasi ko‘rsatgichlarini kamaytirish maqsadida ko‘z bilan aniqlanmaydigan usulda o‘g‘irlangan turi uchun Original Food Invest korxonasi 302 million so‘m jarimaga tortilgan.
Izoh (0)