«Ўзэнергоинспекция»нинг Жиззах ҳудудий бўлими ва МИБ Жиззах шаҳар бошқармасининг қўшма иш режасига асосан истеъмолчиларнинг электр энергиясидан фойдаланиш қоидалари бўйича ўрганишлар олиб борилганда электр энергиясини ўғирлашнинг «антиқа» усули аниқланди, деб хабар бермоқда Энергетика вазирлиги.
Ўрганишлар мобайнида Жиззах шаҳридаги Original Food Invest МЧЖга қарашли умумий овқатланиш шохобчасида ўрнатилган Mercury 230 ART электр ҳисоблагичидаги ишлаб чиқарувчи заводнинг голографик муҳрига зиён етказилганлиги шубҳа уйғотган.
Бу ҳолатга аниқлик киритиш мақсадида, ушбу турдаги электр ҳисоблагичлар ишлаб чиқарувчининг Ўзбекистондаги вакили бўлган Neotech Group МЧЖга мурожаат қилинган.
Электр ҳисоблагичнинг стандарт талабларига мослиги текширилганда электр энергиясини ўғирлашнинг «антиқа» тури аниқланган. Neotech Group МЧЖнинг берган хулосасига кўра, Original Food Invest МЧЖнинг электр ҳисоблагичдаги завод томонидан ўрнатилган голографик муҳр ва кафолат ёрлиғи бузилганлиги, энг муҳими — электр ҳисоблагичнинг ички хотира блоки алмаштириб, бошқа ҳисоблагичнинг ички хотира блоки ўрнатилганлиги аниқланган.
Ушбу ҳолат бўйича Жиззах шаҳри Мажбурий Ижро Бюроси томонидан қоидабузарлик далолатномаси расмийлаштирилган ва истеъмолчи электр тармоғидан узилган.
«Ўзэнергоинспекция»нинг Жиззах ҳудудий бўлими мутахассиси хулосаси асосида, истеъмол қилинган электр энергияси кўрсатгичларини камайтириш мақсадида кўз билан аниқланмайдиган усулда ўғирланган тури учун Original Food Invest корхонаси 302 миллион сўм жаримага тортилган.
Изоҳ (0)