Samarqand tumani hokimligi ishchi guruhi tomonidan tumandagi 4 ta maktabgacha ta’lim muassasasida o‘tkazilgan o‘rganish yuzasidan Samarqand viloyat Maktabgacha ta’lim boshqarmasi o‘z munosabatini bildirdi. Bu haqda “Daryo” muxbiri xabar bermoqda.
Internet saytlari, xususan, “Daryo” nashrida chop etilgan “Uchar tovuqlar yoxud maktabgacha ta’lim muassaslarida ahvol qanday?” maqolasida ko‘rsatilgan kamchiliklarni bartaraf etish yuzasidan bo‘limning mas’ul xodimlari tomonidan maqolada nomlari tilga olingan 4 ta (1, 9, 13, 25) maktabgacha ta’lim muassasalari faoliyati joyiga borib o‘rganildi.
Xususan, ishchi guruhi tomonidan o‘rganish jarayonida 1-son maktabgacha ta’lim muassasasining kanalizatsiya masalasi bilan bog‘liq muammosiga ham aniqlik kiritildi. 1974-yilda qurilgan muassasaning haqiqatda kanalizatsiya quvurlari eskirib ketgan. Muassasa xodimlari mavjud muammoni bartaraf etib, tarbiyalanuvchilar uchun shart-sharoitni yaratdi.
Ishchi guruh tomonidan o‘rganish jarayonida ma’lum bo‘lishicha, tekshiruvchi kelgan kuni menyu bo‘yicha 180 nafar bolaning ovqatiga 18 kilogramm go‘sht mahsuloti solinishi kerak bo‘lgan. Menyu bo‘yicha mazkur go‘shtning 10 kilogrami tovuq go‘shti, 8 kilogrammi mol go‘shti qilib belgilangan. Maqolada tilga olingani kabi hech qaysi tovuq “tabaka” bo‘lishini bilib “uchib” ketmagan.
—Tarbiyalanuvchilarining to‘liq va xavfsiz ovqatlantirish rejasi yaratilib, ushbu rejim muntazam ravishda nazoratga olingan, — deydi 11-MTM mudirasi Laziza Akobirova. —Ular qaynatilgan suv bilan ta’minlanishi muntazam nazoratga olinib, har juma muassasada obodonlashtirish va ko‘kalamzorlashtirish kuni sifatida belgilab qo‘yildi.
25-maktabgacha ta’lim muassasasi tomonidan ham tanqid ostiga olingan holatlar bartaraf etildi. Muassasaning atrofi obodonlashtirilib, ovqat tayyorlash bilan bog‘liq holat yaxshilandi. Yong‘in xavfsizligi talablariga asosan ko‘rsatilgan kamchiliklar bartaraf etildi.
– Aniqlangan kamchiliklarni bartaraf etish va kelgusida shu kabi holatlarning oldini olish maqsadida chora-tadbirlar belgilab olindi, — deydi 25-maktabgacha ta’lim muassasasi mudirasi Sanobar Mirsaidova.
O‘rganish natijalari yuzasidan tumandagi 1-MTM hamshirasi Shoxida Jalolova, 25-MTM xo‘jalik mudiri Sanobar Mardonova o‘z vazifasiga sovuqqonlik bilan munosabatda bo‘lgani uchun egallab turgan vazifasidan ozod etildi. Shuningdek, 1, 9, 13, va 25- maktabgacha ta’lim muassasasi mudiralariga tegishli intizomiy chora ko‘rish taklifi berildi.
P.S. Mazkur maqola e’lon qilinganidan so‘ng oshpaz ayolning oila a’zolari e’tiroz bildirib, gazeta va internet nashrlarida uning ruxsatisiz rasmni tarqatgan OAVlar qonun oldida javob berishini talab qildi.
Izoh (0)