Самарқанд тумани ҳокимлиги ишчи гуруҳи томонидан тумандаги 4 та мактабгача таълим муассасасида ўтказилган ўрганиш юзасидан Самарқанд вилоят Мактабгача таълим бошқармаси ўз муносабатини билдирди. Бу ҳақда «Дарё» мухбири хабар бермоқда.
Интернет сайтлари, хусусан, «Дарё» нашрида чоп этилган «Учар товуқлар ёхуд мактабгача таълим муассасларида аҳвол қандай?» мақоласида кўрсатилган камчиликларни бартараф этиш юзасидан бўлимнинг масъул ходимлари томонидан мақолада номлари тилга олинган 4 та (1, 9, 13, 25) мактабгача таълим муассасалари фаолияти жойига бориб ўрганилди.
Хусусан, ишчи гуруҳи томонидан ўрганиш жараёнида 1-сон мактабгача таълим муассасасининг канализация масаласи билан боғлиқ муаммосига ҳам аниқлик киритилди. 1974 йилда қурилган муассасанинг ҳақиқатда канализация қувурлари эскириб кетган. Муассаса ходимлари мавжуд муаммони бартараф этиб, тарбияланувчилар учун шарт-шароитни яратди.
Ишчи гуруҳ томонидан ўрганиш жараёнида маълум бўлишича, текширувчи келган куни меню бўйича 180 нафар боланинг овқатига 18 килограмм гўшт маҳсулоти солиниши керак бўлган. Меню бўйича мазкур гўштнинг 10 килограми товуқ гўшти, 8 килограмми мол гўшти қилиб белгиланган. Мақолада тилга олингани каби ҳеч қайси товуқ «табака» бўлишини билиб «учиб» кетмаган.
—Тарбияланувчиларининг тўлиқ ва хавфсиз овқатлантириш режаси яратилиб, ушбу режим мунтазам равишда назоратга олинган, — дейди 11-МТМ мудираси Лазиза Акобирова. —Улар қайнатилган сув билан таъминланиши мунтазам назоратга олиниб, ҳар жума муассасада ободонлаштириш ва кўкаламзорлаштириш куни сифатида белгилаб қўйилди.
25-мактабгача таълим муассасаси томонидан ҳам танқид остига олинган ҳолатлар бартараф этилди. Муассасанинг атрофи ободонлаштирилиб, овқат тайёрлаш билан боғлиқ ҳолат яхшиланди. Ёнғин хавфсизлиги талабларига асосан кўрсатилган камчиликлар бартараф этилди.
– Аниқланган камчиликларни бартараф этиш ва келгусида шу каби ҳолатларнинг олдини олиш мақсадида чора-тадбирлар белгилаб олинди, — дейди 25-мактабгача таълим муассасаси мудираси Санобар Мирсаидова.
Ўрганиш натижалари юзасидан тумандаги 1-МТМ ҳамшираси Шохида Жалолова, 25-МТМ хўжалик мудири Санобар Мардонова ўз вазифасига совуққонлик билан муносабатда бўлгани учун эгаллаб турган вазифасидан озод этилди. Шунингдек, 1, 9, 13, ва 25- мактабгача таълим муассасаси мудираларига тегишли интизомий чора кўриш таклифи берилди.
П.С. Мазкур мақола эълон қилинганидан сўнг ошпаз аёлнинг оила аъзолари эътироз билдириб, газета ва интернет нашрларида унинг рухсатисиз расмни тарқатган ОАВлар қонун олдида жавоб беришини талаб қилди.
Изоҳ (0)