Samarqandda viloyat hokimi raisligida yangi o‘quv yili oldidan videoselektor yig‘ilishi o‘tkazilgan. Zarnews’ning xabar berishicha, yig‘ilishda keyingi vaqtlarda xalq ta’limi tizimida shaklga katta e’tibor qaratilib, mazmun va sifat masalasi chetda qolgani ta’kidlangan.
Oqibatda O‘zbekiston maktablarining milliy reytingida Samarqand viloyati 13-o‘ringa tushib qolgan. Aksariyat tumanlardagi maktablar reytingning eng quyi o‘rinlarida qayd etilgan.
“Samarqand shahri va tumani, Urgut, Toyloq, Payariq va Pastdarg‘om tumanlaridagi ta’lim sifati past bo‘lgan 10 tadan maktabga videokuzatuv uskunalari o‘rnatiladi. Qolgan tumanlarda ham xuddi shu tartibda 5 tadan maktablarning sinfxonalari, o‘qituvchilar xonasi, kerak bo‘lsa hovlisiga ham kameralar o‘rnatiladi”, — deb ta’kidlagan viloyat hokimi Erkin Turdimov.Buning uchun tuman, shahar hokimliklarining zaxira fondidan mablag‘ ajratiladi, belgilangan ishlar 10-sentabrga qadar yakunlanishi shart. “Bu avvalo ta’lim sifati past maktablarda jamoatchilik nazoratini amalga oshirishga xizmat qiladi. Viloyat hokimiga ham kirish imkonini beruvchi tizim 24 soat ishlashi kerak”, — deb yozmoqda Zarnews.
Izoh (0)