Qashqadaryo viloyatining Mirishkor tumanida mustaqillikning 28 yilligi bayrami munosabati bilan 20 ga yaqin ijtimoiy soha obyekti foydalanishga topshirildi. Bu haqda “Daryo”ga tuman hokimligi axborot xizmati xabar bermoqda.
Tumanning “Chandir” qishlog‘ida Madaniyat markazi, “Pomuq”da esa 100 o‘ringa mo‘ljallangan davlat maktabgacha ta’lim tashkiloti, “Jeynov” qishlog‘ida qishloq shifoxonasi, “Guliston”da esa tikuv markazi foydalanishga topshirilgan.
— Shuningdek, Mirishkor qishlog‘ida ayollar reabilitatsiya markazi, tuman markazida “Yakkasaroy” yoshlar guzari, “Elobod” qishlog‘idagi ichki yo‘llar qurilishi hamda 11 ta uy sharoitidagi bog‘cha ochilishi tantanali tus oldi, — deydi tuman hokimligi axborot xizmati rahbari Fayzulla Eshqulov. — Mustaqilligimizning 28 yillik bayramiga tuhfa sifatida ishga tushirilgan mazkur inshootlar tufayli endilikda 200 nafar kishi ishli bo‘ldi.
Ma’lum qilishlaricha, birgina “Guliston” qishlog‘idagi “Mehnat-rohat” palatkali shaharchasidagi chevarchilik tikuv markazi hamda “Mirishkor” qishlog‘idagi ayollar reabilitatsiya markazi va Yangi Mirishkor shaharchasidagi “Yakkasaroy” yoshlar guzari ochilishi tufayli 100 nafardan ortiq xotin-qiz va yoshlar doimiy ish o‘rniga ega bo‘lgan.
Bayram munosabati bilan tumandagi eng katta aholi maskanlaridan biri bo‘lgan “Pomuq” qishlog‘iga toza ichimlik suvi keltirilgan. “Do‘stlik” massiviga esa suv quvurlari o‘tkazilmoqda. Ishlar bitgach, ushbu hududga ham toza ichimlik suvi keltiriladi.
Mazkur ijtimoiy soha obyektlarining ochilishida tuman hokimi Ravshan Komilov hamda jamoatchilik vakillari ishtirok etib, aholi turmushi obod bo‘lsa, ko‘ngillar shod bo‘lishini ta’kidladi.
Izoh (0)