1-sentabr, yakshanba kuni Mudofaa vazirligiga qarshli oliy harbiy ta’lim muassasalari kursantlari tantanali ravishda Harbiy qasamyod qabul qildi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Xususan, Qashqadaryo viloyatining Qarshi shahrida yangidan barpo etilgan oliy harbiy ta’lim muassasasi — O‘zbekiston oliy harbiy aviatsiya bilim yurtining ochilishi, shuningdek, bilim yurti 1-kurs kursantlarining Harbiy qasamyod qabul qilishiga bag‘ishlangan tantanali tadbir o‘tkazildi.
Tadbirda O‘zbekiston Prezidenti huzuridagi Xavfsizlik kengashi kotibi Viktor Mahmudov, Mudofaa vaziri general-mayor Bahodir Qurbonov, Qashqadaryo viloyati hokimi Zafar Ro‘ziyev, Janubi-g‘arbiy maxsus harbiy okrug qo‘shinlari qo‘mondonligi, Mudofaa vazirligi faxriylari, keng jamoatchilik, ommaviy axborot vositalari vakillari ishtirok etdi.
Yangi obyekt ramziy lentasi qirqilgach, oliy harbiy aviatsiya bilim yurti boshlig‘iga ramziy kalit, shuningdek, Prezident nomidan yengil avtomobil va viloyat hokimi nomidan Isuzu avtobusi topshirildi.
Obyektni kapital ta’mirlash ishlarida ishtirok etgan mutaxassislar Mudofaa vazirining esdalik nishonlari bilan taqdirlandi.
25 yillik tarixga ega oliy harbiy ta’lim muassasasi ochilishiga bag‘ishlangan tadbir davomida Harbiy havo kuchlari tomonidan tayyorlangan havo paradi va aviashou namoyish etildi. Parad avvalida N-125 rusumli vertolyotda davlat bayrog‘i olib o‘tildi. Mi-8MT, Mi-24 vertolyotlari, S-295, Su-25, Mig-29 samolyotlarining bilim yurti uzra parvozi mehmonlar tomonidan olqishlandi.
Shuningdek, Qurolli Kuchlar akademiyasida bo‘lib o‘tgan tantanada ham akademiyaning umumqo‘shin fakultetiga o‘qishga kirgan kursantlar tantanali Harbiy qasamyod qabul qildi.
Izoh (0)