Qishloq xo‘jaligi vazirligida Germaniyaning Reynland—Pfals federal yeri ishbilarmon doira vakillari ishtirokida vinochilik, uzumchilik sohasidagi hamkorlik aloqalarini mustahkamlashga qaratilgan uchrashuv tashkil etildi. Bu haqda “Daryo”ga vazirlik matbuot xizmati ma’lum qildi.
Uchrashuvda Qishloq xo‘jaligi vaziri o‘rinbosari, Qishloq xo‘jaligi va oziq-ovqat ta’minoti ilmiy-ishlab chiqarish markazi bosh direktori Bahodir Xoliqov bugungi kunda O‘zbekistonda Germaniyada yetishtirilayotgan uzumlarning navlarini joriy etish, nemis texnologiyasi asosida uni yetishtirishga tayyor ekanligini bildirdi.
Qayd etilganidek, 2019-yilda 8290 gektar, 2020-yilda 8840 gektar hamda 2021-yilda 6270 gektar maydonda yangi tokzorlar barpo qilishning manzilli dasturi ishlab chiqilgan. Bugungi kunda mahalliy navlardan tashqari Fransiya, Italiya, Germaniya, Gruziya va boshqa davlatlardan introduksiya qilingan yuqori sifatli vino, vino materiallar va shampan vinolari tayyorlash imkonini beruvchi uzum navlari ekilmoqda.
Reynland—Pfals federal yeri ishbilarmon doira vakillari bugungi kunda vino uchun yetishtirilayotgan uzumning 80 foizi yuqori texnologiyalar asosida maxsus kombaynlarda ekilayotgani, tajribali mutaxassislar nemis texnologiyasini O‘zbekistonda joriy etishga tayyor ekanligini bildirdi.
Muloqot davomida O‘zbekistonda Germaniya uzum navlarini yetishtirish, sohaga yangi texnologiyalarni joriy etish, jumladan, uzum navlarini kombaynlarda ekish va hosilini yig‘ib olish, shuningdek, tokzorlardan yuqori hosil yetishtirishda zamonaviy sug‘orish texnologiyalari, ya’ni tomchilatib sug‘orish tizimini keng qo‘llash maqsadida hamkorlik aloqalarini yanada mustahkamlashga kelishib olindi.
Izoh (0)