Kecha, 15-avgust kuni Olmazor tumani hokimi o‘rinbosari Abdurasul Vahobov “Kun.uz” tahririyati xodimlariga tahdid qilgani haqida xabar berilgan edi.
Bugun Toshkent shahar hokimligi matbuot xizmati tomonidan Abdurasul Vahobovning videointervyusi e’lon qilindi. Ushbu intervyuda Abdurasul Vahobov “Kun.uz” muxbiri Rahmatilla Isroilov muqaddam undan tamagirlik yo‘li bilan yer talab qilgani va buning evaziga katta miqdorda pora taklif qilgani haqidagi da’voni ilgari surdi.
Mazkur da’vo yuzasidan “Kun.uz” zudlik bilan o‘z ichki surishtiruvini o‘tkazib, tahririyat muxbiri Rahmatilla Isroilov va boshqa xodimlariga nisbatan xizmat tekshiruvi tayinladi.
Xizmat tekshiruvida muxbir Rahmatilla Isroilov unga nisbatan Abdurasul Vahobov ilgari surayotgan ayblovlar biror asosga ega emasligini, Abdurasul Vahobov bilan muqaddam hech qachon ko‘rishmaganini, hayotda ilk marta 14-avgust kuni uchrashganini va o‘z-o‘zidan Abdurasul Vahobovning gaplari tuhmatdan iboratligini ma’lum qildi.
Bundan tashqari, 15 avgust kuni Toshkent shahar hokimligi matbuot xizmati xodimlari tomonidan aynan mazkur masala yuzasidan tashkil qilingan yuzma-yuz uchrashuvda Abdurasul Vahobov “Kun.uz” muxbiri Rahmatilla Isroilovni tanimasligini va hodisa yuz bergan kuni (14-avgust) birinchi marta ko‘rganini bayon qilgan (buni tasdiqlovchi audioyozuvlar mavjud).
Hozirda mazkur holat yuzasidan tergovga qadar surishtiruv ishlari olib borilayotgani sababli xizmat tekshiruvi davomida to‘plangan hujjatlar (tegishli audio va videomateriallar bilan birga) qo‘shib o‘rganish uchun Toshkent shahar prokuraturasiga yuborildi.
Bundan tashqari, muxbir Rahmatilla Isroilov o‘ziga nisbatan og‘ir jinoyat sodir etishda ayblab tuhmat qilgani uchun Olmazor tuman hokimi o‘rinbosari Abdurasul Vahobovga nisbatan qonuniy chora ko‘rishni so‘rab, O‘zbekiston Respublikasi Prezidentining virtual qabulxonasi orqali Bosh prokuraturaga shikoyat yo‘llaganini ma’lum qildi.
Toshkent shahar prokuraturasida olib borilayotgan tergovga qadar surishtiruv jarayonlariga xalaqit bermaslik, surishtiruv jarayonlari xolisligiga ta’sir va bosim o‘tkazmaslik maqsadida “Kun.uz” tahririyati ushbu mavzuda boshqa ma’lumotlarni oshkor qilmaslikka qaror qildi.
Ushbu holat yuzasidan O‘zbekiston jurnalistlari ijodiy uyushmasi, Toshkent shahar hokimligi hamda Axborot va ommaviy kommunikatsiyalar agentligi o‘rganish o‘tkazayotganini ma’lum qildi. Deputat Rasul Kusherboyev jurnalistlarga qo‘pol munosabatda bo‘lgan hokim o‘rinbosari o‘z lavozimini tark etishi kerakligi haqida fikr bildirdi.
Izoh (0)