Xalq ta’limi vazirligi Surxondaryo viloyati Boysun tumanidagi “Tuzbozor” mahallasida yashovchi nafaqadagi o‘qituvchi Hakim Po‘latov murojaatnomasini o‘rganib chiqadi va tegishli davlat organlariga masalani hal etish uchun yuboradi.
Hakim Po‘latov Facebook ijtimoiy tarmog‘ida mustaqillik yillari davomida Boysun tumanidagi 2-umumiy o‘rta ta’lim maktabi binosida boshqa tashkilotlar noqonuniy joylashtirilganligini ma’lum qilib, amaliy yordam berilishini so‘ragan.
Vazirlar Mahkamasining 2018-yil 16-fevraldagi 122-sonli farmoyishining 1-bandida Respublikada faoliyat ko‘rsatayotgan davlat ta’lim muassasalari, xususan, maktabgacha ta’lim, o‘rta ta’lim, kasb-hunar ta’limi muassasalarining mol-mulki, bino va inshootlari hamda yer maydonlarini Prezident yoki Vazirlar Mahkamasining tegishli qarorisiz tashkilotlarga berish yoki ta’lim jarayoniga tegishli bo‘lmagan maqsadlarda foydalanish qat’iyan man qilingan.
Prezidentning 2018-yil 5-sentabrdagi “Xalq ta’limi tizimiga boshqaruvning yangi tamoyillarini joriy etish chora-tadbirlari to‘g‘risida”gi qarorining 10-bandiga ko‘ra, umumta’lim va maktabdan tashqari muassasalarning yer uchastkalari va ko‘chmas mulkini Xalq ta’limi vaziri bilan kelishmasdan begonalashtirish taqiqlanadi.
Prezidentning 2018-yil 5-sentabrdagi “Xalq ta’limini boshqarish tizimini takomillashtirish bo‘yicha qo‘shimcha chora-tadbirlar to‘g‘risida”gi farmonning 3-bandiga ko‘ra, Qoraqalpog‘iston Respublikasi Vazirlar Kengashi raisi, viloyatlar va Toshkent shahar hokimlari xalq ta’limi muassasalari hududining va ko‘chmas mulkining butunligini hamda daxlsizligini belgilangan tartibda ta’minlashi lozim.
Xalq ta’limi vazirligi mahalliy hokimliklardan qonunchilik normalarini qat’iy taminlashlarini talab qiladi.
Izoh (0)