O‘zbekistonning Qozon shahridagi (Rossiya) Bosh konsulxonasi 2019-yil 7-avgust kuni Orenburg viloyatida onasi O‘zbekiston fuqarosi bo‘lgan bolaning tug‘ilishi to‘g‘risida olingan ma’lumotni tasdiqladi. Chaqaloq og‘ir nuqson — yurak muammolari bilan tug‘ilgan bo‘lib, hozirda barokamerada qolmoqda. Shifokorlarning fikriga ko‘ra, bolaga shoshilinch ravishda jarrohlik operatsiyasi o‘tkazish zarur, lekin uning onasi Rossiya fuqarosi emasligi sababli buning hozirda imkoni yo‘q. Bu haqda TIV matbuot xizmati xabar bermoqda.
Bosh konsulxona vaziyatni nazoratga oldi va konsullik-huquqiy va tashkiliy masalalarini hal qilishda, shu jumladan, bolaning vataniga qaytishi uchun guvohnoma berishda ko‘mak bermoqda. TIV konsullik-huquqiy departamenti ushbu masala yuzasidan O‘zbekiston Sog‘liqni saqlash vazirligidan maslahat so‘rab murojaat qildi.
Konsullik-huquqiy departamenti Rossiyaning Volga bo‘yi federal okrugi (Boshqirdiston Respublikasi, Kriov viloyati, Mariy El Respublikasi, Mordoviya Respublikasi, Nijegorod viloyati, Orenburg viloyati, Penza viloyati, Perm o‘lkasi, Samara viloyati, Saratov viloyati, Tatariston Respublikasi, Udmurtiya Respublikasi, Ulyanov viloyati, Chuvashiya Respublikasi) hududida bo‘lib turgan O‘zbekiston fuqarolariga ular zarurat tug‘ilgan holatlarda mamlakatning Qozon shahridagi Bosh konsulxonasiga quyidagi telefon orqali murojaat qilishlari mumkinligini eslatib o‘tadi: +7-967-772-66-00.
Izoh (0)