Қишлоқ хўжалиги вазирлигида Германиянинг Рейнланд—Пфалс федерал ери ишбилармон доира вакиллари иштирокида виночилик, узумчилик соҳасидаги ҳамкорлик алоқаларини мустаҳкамлашга қаратилган учрашув ташкил этилди. Бу ҳақда «Дарё»га вазирлик матбуот хизмати маълум қилди.
Учрашувда Қишлоқ хўжалиги вазири ўринбосари, Қишлоқ хўжалиги ва озиқ-овқат таъминоти илмий-ишлаб чиқариш маркази бош директори Баҳодир Холиқов бугунги кунда Ўзбекистонда Германияда етиштирилаётган узумларнинг навларини жорий этиш, немис технологияси асосида уни етиштиришга тайёр эканлигини билдирди.
Қайд этилганидек, 2019 йилда 8290 гектар, 2020 йилда 8840 гектар ҳамда 2021 йилда 6270 гектар майдонда янги токзорлар барпо қилишнинг манзилли дастури ишлаб чиқилган. Бугунги кунда маҳаллий навлардан ташқари Франция, Италия, Германия, Грузия ва бошқа давлатлардан интродукция қилинган юқори сифатли вино, вино материаллар ва шампан винолари тайёрлаш имконини берувчи узум навлари экилмоқда.
Рейнланд—Пфалс федерал ери ишбилармон доира вакиллари бугунги кунда вино учун етиштирилаётган узумнинг 80 фоизи юқори технологиялар асосида махсус комбайнларда экилаётгани, тажрибали мутахассислар немис технологиясини Ўзбекистонда жорий этишга тайёр эканлигини билдирди.
Мулоқот давомида Ўзбекистонда Германия узум навларини етиштириш, соҳага янги технологияларни жорий этиш, жумладан, узум навларини комбайнларда экиш ва ҳосилини йиғиб олиш, шунингдек, токзорлардан юқори ҳосил етиштиришда замонавий суғориш технологиялари, яъни томчилатиб суғориш тизимини кенг қўллаш мақсадида ҳамкорлик алоқаларини янада мустаҳкамлашга келишиб олинди.
Изоҳ (0)