APL klublari transferlar oynasi vaqtida jami qancha pul sarflagani ma’lum bo‘ldi

Angliya Premyer ligasi klublari 2019-yil yozgi transferlar mavsumida qancha mablag‘ sarflagani ochiqlandi, deya xabar qilmoqda Transfermarkt.

Ma’lum bo‘lishicha, Angliya oliy divizioni vakillari transferlarga jami 1,386 milliard funt sarfladi.

Ushbu transfer oynasida eng qimmat xaridni “Manchester Yunayted” amalga oshirdi. Mankunianlar “Lester”dan Harri Maguayrni 78,3 million funtga sotib oldi. Ikkinchi o‘rinni “Lill”dan Nikolya Pepeni xarid qilgan (72 million funt) “Arsenal” egalladi.

Keyingi ikki o‘rindan “Manchester Siti”ning xaridlari joy oldi. “Shaharliklar” “Atletiko”dan yarim himoyachi Rodrini (63 million funt) va “Yuventus”dan himoyachi Joau Kanseluni (58,5 million funt) sotib oldi. Kuchli beshlikni “Lion”dan 54 million funt evaziga “Tottenhem”ga o‘tgan Tangi Ndombele transferi yakunlab berdi.

Ma’lumot o‘rnida, Premyer liga klublari 2017-yilgi mavsumda transferlarga rekord darajada ko‘p pul (1,455 milliard funt) sarflagan.