“Real” tarixidagi eng qimmat 5 ta transfer haqida

Madridning “Real” klubi XXI asr avvalidayoq o‘zining katta transferlari bilan futbol jamoatchiligi va muxlislarni o‘ziga qaratib ulgurgan edi. 2019-yil yoziga kelib, “qaymoqranglilar” yana transfer bozorida faollik ko‘rsatdi. Klub birin-ketin o‘z safiga Eder Militao, Rodrigo Goes, Luka Yovich, Eden Azar kabi futbolchilarni qo‘shib oldi. Biroq ulardan faqat Eden Azargina klub tarixidagi eng qimmat transferlar beshligiga kirdi.

Quyida “Real” amalga oshirgan eng qimmat transferlar beshligi haqida suhbatlashamiz:

1. Garet Beyl: “Tottenhem” — “Real”, 101 million yevro (2013)

“Tottenhem”dagi qoyilmaqom o‘yinlaridan so‘ng uelslik futbolchi Yevropa grandlari oromini o‘g‘irladi. Garetning “Real”ga o‘tishi haqidagi serial 2013-yilning butun yozi bo‘yi davom etdi. Beyl bu orada hattoki “Tottenhem”ning mavsumoldi yig‘inlarini, kamiga mavsum startini ham o‘tkazib yubordi. Uzoq davom etgan serialga kuzning birinchi kunida yakuniga yetdi. “Real” 1-sentabr kuni Beyl transferini rasman e’lon qildi. Klub vinger uchun “Tottenhem”ga 101 million yevroni qurtdek sanab berdi. Shu tariqa Beyl “Real” tarixidagi eng qimmat futbolchiga aylandi. Garet yangi klubidagi debyut o‘yinidayoq gol urishga erishdi, biroq oradan ko‘p o‘tmay jarohatga yo‘liqdi. Mavsum so‘ngiga borib esa uelslik futbolchi Krishtianu Ronaldu hamda Karim Benzema bilan qoyilmaqom trioni hosil qildi. Beylning “Real”dagi gullagan davri esa 2014-yil aprelidan boshlangandi. Futbolchi 2014-yil 16-aprel sanasida “Barselona”ga qarshi Ispaniya Kubogi finalida o‘sha mashhur golini uradi. Beyl Mark Bartrani tezlikda ortda qoldirgan holda “Real”ga g‘alaba keltirgan golga mualliflik qiladi. Oradan bir oy o‘tib esa Garet Yevropa Chempionlar Ligasi finalida “Atletiko M” darvozasiga g‘alaba golini urishga muvaffaq bo‘ladi. Hozir esa Beylning “Real”dan ketishi mumkinligi haqida xabarlar yetarlicha topiladi. Shunisi aniqki, “Qirollik klubi” ustozi Zinedin Zidan Beylni klubning kelasi mavsumdagi rejalariga kiritmagan.

2. Eden Azar: “Chelsi” — “Real”, 100 million yevro (2019)

“Chelsi”dagi 7 yillik faoliyatidan so‘ng belgiyalik futbolchining bolalikdagi orzulari ro‘yobga chiqdi. “Real” Ronaldu ketgach na Beyl, Isko, Asensio va na Modrich jamoa yetakchisiga aylana oldi. Buni juda yaxshi tushungan Peres bobo esa Eden Azarni Madridga olib kelishga chog‘landi. Ammo tan olish kerak, Azarni “Real”ga o‘tishi oson kechmadi. “Chelsi” klubga qo‘yilgan transfer taqiqi sabab belgiyalik transferiga kelganda klub ishni ortga suraverdi. Biroq Madridning 100 million yevrolik taklifi Roman Abramovichni ham ko‘ndira oldi. Eden Madridga Yevropa Ligasi g‘olibi va Angliya Premyer Ligasining eng yaxshi o‘yinchilaridan biri sifatida keldi. Ammo futbolchini oldinda katta sinovlar kutib turgani ham rost. Axir Madrid ko‘z yoshlarga ishonmaydi.

3. Krishtianu Ronaldu: “Manchester Yunayted” — “Real”, 94 million yevro (2009)

Nafaqat “Real” 2009-yil yozida o‘z tarixidagi  va dunyodagi eng qimmat (o‘sha vaqtdagi) transferni amalga oshirdi, balki Ronalduning transferi klub tarixidagi eng omadlisi ham bo‘ldi. “Qirollik klubi” Krishtianu uchun “Manchester Yunayted” g‘aznasiga 94 million yevro o‘tkazib berdi. Ronni Madridga yilning eng yaxshi o‘yinchisi sifatida keldi. U “qaymoqranglilar” safida qayd etish va erishish mumkin bo‘lgan barcha rekord hamda sovrinlarni o‘ziniki qildi. Ronaldu “Real” bilan umumiy 15 ta jamoaviy sovringa ega chiqdi. Bundan tashqari u 4 marta “Oltin to‘p” sohibi bo‘ldi. “Real”dagi faoliyatini esa 2018-yil yakunladi. Futbolchi 117 million yevro evaziga Turinning “Yuventus” klubiga yo‘l oldi. Uning Madrid klubidagi statistikasi va qoyilmaqom o‘yinlari esa hech qachon muxlislar yodidan chiqmasligi aniq — 438 ta o‘yin, 450 ta gol.

4. Zinedin Zidan: “Yuventus” — “Real”, 77,5 million yevro (2001)

Florentino Peres 2001-yil yozida transfer bozori siyosatini tamoman boshqa tarafga burib yubordi. Ispaniyalik funksioner 77,5 million yevro evaziga “Yuventus”dan Zinedin Zidanni olib keldi. Zidanning xaridi yillar davomida barcha davrlarning eng qimmat transferi sifatida reytinglardan tushmadi. Zizu “Real”dagi ilk mavsumidayoq jamoaning asosiy o‘yinchisiga aylana oladi. O‘sha yili “Real” Yevropa Chempionlar Ligasi finalida “Bayer Leverkuzen” ustidan g‘alaba qozonadi. Zidan esa futbol tarixidagi eng chiroyli gollardan birini uradi. Fransiyalik futbolchi Figu, Ronaldo, Bekhem, Karlos va Raul kabi yulduzlar vaqtida ham jamoa yetakchisi bo‘lib qoldi. Zizu futbolchilik faoliyatiga ham aynan “Real”da 2006-yil yakun yasadi. Keyinchalik esa u klubga murabbiy sifatida qaytib, nima karomatlar ko‘rsatganini bilsangiz kerak, aziz muxlis!

5. Xames Rodriges: “Monako” — “Real”, 75 million yevro (2014)

“Portu”da tanilib, “Monako”ga yo‘l olgan kolumbiyalik yigit Fransiyada ham uzoq ushlanib qolmadi. Monegasklar tarkibidagi 1 yillik faoliyatdan so‘ng Xames 2014-yilgi Jahon Chempionatida shunday o‘yin namoyish etdiki, natijada Florentino Peres kolumbiyalik futbolchini “Real”ga chorladi. 22-iyul sanasida “Qirollik klubi” Xames transferini e’lon qildi. Ma’lumotlarga ko‘ra, Rodrigez uchun madridliklar “Monako” g‘aznasiga 75 million yevro o‘tkazib beradi. 2014/15-yilgi mavsum Xames uchun “Real”dagi eng omadlisi sifatida yodda qoldi. U klub safida 46 ta o‘yin o‘tkazdi va 17 ta gol urdi. Oqibatda futbolchi La Ligada mavsumning eng yaxshi yarim himoyachisi deb topildi. Zinedin Zidan “Real” boshqaruviga kelgach esa futbolchi zaxiradan maydonga tushadigan futbolchiga aylandi. Shunga qaramay 2016/17-yilgi mavsumda futbolchi 32 ta o‘yin o‘tkazib, 11 ta gol urdi va 13 ta golli uzatmani amalga oshirdi. 2017-yilning 11-iyulida esa Xames 2 yillik ijara sharti bilan “Bavariya” safiga o‘tdi. Myunxenliklar esa 2019-yil yozida futbolchini 40 million yevroga sotib olish imkoniyatidan foydalanmadi. Ayni damda Xames “Real” ixtiyoriga qaytgan. Biroq uning klubdan ketishi ovoza qilinmqda. Rodrigesning xizmatlariga esa “Napoli” hamda “Atletiko Madrid” jiddiy qiziqish bildirgan.