Microsoft rossiyalik xakerlar printerlar orqali hujum uyushtirayotganini ma’lum qildi

Microsoft korporatsiyasi printerlar va VoIP-telefonlar orqali tarmoqqa kirishga uringan rossiyalik xakerlar haqida ma’lum qildi, deb xabar beradi “Korrespondent.net”.

Ekspertlar tomonidan aniqlangan korporativ tarmoqlardagi buzilishlar qurilmalardagi standart parollar o‘zgartirilmasdan ishlatilgani, shuningdek, ulardan birining dasturiy ta’minoti yangilanmagani sabab amalga oshirilgan.

Microsoft mutaxassislarining so‘zlariga ko‘ra, hujumlarni Strontium nomi bilan tanilgan kiberjinoyatchilar guruhi amalga oshirgan. Avvalroq, mazkur guruhning Rossiya Qurolli kuchlari bosh shtabiga aloqasi borligi ma’lum qilingandi. AQShning ta’kidlashicha, 2016-yilgi prezidentlik saylovlarida amalga oshirilgan kiberhujumlar ortida ham aynan shular turadi.