“Daryo” o‘tayotgan haftada sodir bo‘lgan eng muhim va muhokamali voqealarni sharhlab o‘tadi.
Haftaning eng shov-shuvli voqealaridan biri Xotin-qizlar qo‘mitasi raisasi Elmira Bositxonovaning bozorchi ayollar ma’naviyat va ma’rifati haqidagi fikri hamda bozorlarda radiouzel orqali shoira Zulfiyaning she’rlari va hadislardan o‘qib berish taklifi bo‘ldi. Bositxonovaning chiqishini ijtimoiy tarmoq faollari tanqid va istehzolar bilan kutib oldi. Aksariyat blogerlar “ma’naviyat” atamasining siyqasi chiqib ketganini tilga olsa, ba’zilar tirikchilik qilayotgan bozorchi ayollarni ma’naviyatsizlikda ayblamasdan, avvalo aholi turmush farovonligini oshirish lozimligini ta’kidladi. Hafta oxirida Xotin-qizlar qo‘mitasi Bositxonovaning gapi noto‘g‘ri talqin etilayotgani va fikr kontekstdan uzib olinganini aytib, o‘z e’tirozini bildirdi.
* * *
Bu yil OTMlarga kirish istagidagi abituriyentlar soni har yilgidan ko‘proq va qabul jarayoni qizg‘inroq o‘tayotgani kuzatilmoqda. Jazirama ob-havo esa bu tadbirni har ikki ma’noda qizdirmoqda. O‘ziga xos rekordlar ham qayd etildi, xususan, Termizda 78 yashar otaxon talaba bo‘lish uchun hujjat topshirgan. Davlat xizmatlari markazlarida hujjatlarni 24 soat davomida qabul qilish joriy etildi. Hujjat topshiruvchilar azbaroyi ko‘pligidan OTMlarda abituriyentlardan ariza qabul qilishning so‘nggi muddati uzaytirilishi mumkinligi aytildi. Ayni sababga ko‘ra DTM serverida muammo ham yuz berdi.
Bunday mislsiz chora-tadbirlar yurtimizda oliy ma’lumot olish istagidagi yoshlar (nafaqat yoshlar) soni faqat ortayotgani va talab-taklif o‘zaro nomutanosibligini anglatadi.
* * *
O‘zbekiston 2019-yilda gaz eksporti hajmini o‘tgan yilga nisbatan 15 foizga oshirishi to‘g‘risida “O‘zbekneftgaz” AJ ma’lum qildi. Biroq ijobiy mazmundagi xabar ham bor: endi gazni aholiga xususiy operatorlar sotishi mumkin bo‘ladi. Shavkat Mirziyoyev 9-iyulda imzolagan qarorda bu sohaga davlat-xususiy sheriklik tamoyillarini kiritishni Energetika vazirligiga topshirgan. Bu gaz ta’minotini moliyaviy sog‘lomlashtirish sari qadam deb baholanmoqda.
* * *
Bundan avvalgi xabarimiz “O‘zbekneftgaz” AJda o‘tkazilayotgan islohotlarning bir qismi edi. Prezident qaroriga muvofiq, “O‘zbekneftgaz” AJ uchga bo‘lindi. Endi u tizimni boshqaradi, tabiiy gazni qazib oladi va qayta ishlaydi, “O‘ztransgaz” gaz yetkazib beradi, “Hududgazta’minot” hududiy gaz taqsimlash tarmoqlarini ekspluatatsiya qiladi va suyultirilgan gazni aholiga sotadi. Bundan tashqari boshqaruv tizimini takomillashtirishga doir boshqa o‘zgarishlar ham amalga oshiriladi.
* * *
Hafta boshida kutilmaganda 1 kilogramm go‘sht narxi 60 ming so‘mgacha ko‘tarilishi kuzatildi. Buning sababi yem va ozuqa narxining oshishi deb talqin etilmoqda. Biroq rasmiylar bozordagi narxga aralashib, sun’iy ravishda pasaytirishga urinayotgani haqidagi xabarlar tarqala boshladi. Davlat statistika qo‘mitasining axborotiga ishonadigan bo‘lsak, 2019-yil 9-iyul holatiga ko‘ra bozorda mol go‘shti (suyaksiz go‘shtidan tashqari) – 28 000 so‘mdan 48 000 so‘mgacha sotiladi.
* * *
Jizzax viloyatida qurilayotgan atom elektr stansiyasiga qarama-qarshi munosabatlar bildirilmoqda. Shunga qaramasdan, o‘zbek AESining yana ikkita energobloki qurilishi e’lon qilindi. Qonunchilik palatasi spikeri o‘rinbosari Boriy Alixonov AESimiz 9 balli zilzilaga ham bardosh berishi va ustiga samolyot qulaganda ham bemalol ishlayverishini ta’kidlab aholini ko‘ngilni to‘q qilishga chaqirdi. AES nomi O‘zbekiston deb atalishi mumkin. AES ishga tushgach Forish tumanidagi 2,5 ming kishi ish bilan ta’minlanadi. O‘zbek AESi yaqinida 50 ming kishiga mo‘ljallangan atomchilar shahri quriladi.
* * *
Ushbu haftada ikkita gaz koni ochildi. Biri Andijon viloyatidagi Chaqar koni bo‘lsa, ikkinchisi Mo‘ynoqdagi Oraliq konidir. Chaqarda 1710 metr chuqurlikdan sutkasiga 300 ming metr kub gaz olinmoqda. Oraliqda esa 3910 metrdan sutkasiga 700–800 ming metr kub gaz chiqmoqda. Bir haftada “O‘zbekneftgaz” ikkita kon ochishi kam uchraydigan quvonchli hodisadir. O‘zbekiston gaz qazib olish bo‘yicha dunyoda 10–12 o‘rinlarda turadi.
* * *
Garchi yangiliklar sirasiga mansub bo‘lmasa ham. o‘qilishi lozim bo‘lgan suhbat-maqolani dayjestimizga qo‘shdik. Gap ilgari Vazirlar Mahkamasi raisining birinchi o‘rinbosari bo‘lib ishlagan Ismoil Jo‘rabekovning Hayraton ko‘prigi portlatilmay qolgani haqidagi xotiralari to‘g‘risida bormoqda. Ushbu maqola saytlarda eng ko‘p o‘qilganlar ro‘yxatida ko‘rindi. Ismoil Jo‘rabekovning aytishicha, mustaqillikning dastlabki yillarida qo‘shni Afg‘onistonda toliblar hokimiyatni olgan va natijada minglab qochqinlar O‘zbekistondan panoh topish ilinjida ko‘prikdan o‘tishni istagan. Biroq marhum prezident Islom Karimov mamlakat tinchligi uchun qochqinlarni o‘tkazmasdan, ko‘prikni portlatishni buyurgan. Ismoil Jo‘rabekov shunday murakkab vaziyatda qochqinlarni mamlakat ichkarisiga qaytarishning imkonini qilgan, qochqinlarga tahdid solgan qurolli jangarilar bilan muzokara o‘tkazib ularni shashtidan tushirgan hamda ko‘prikni asrab qolgan.
* * *
1-avgustdan oyliklar 10 foizga oshirilib, EKIH 223 ming so‘mga yetadi (hozir 202 730 so‘m). Eng kam yoshga doir pensiyalar va bolalikdan nogironlarga beriladigan nafaqa – oyiga 436 150 so‘m (hozirda 396500 so‘m); zarur ish stajiga ega bo‘lmagan keksa yoshdagi va mehnatga layoqatsiz fuqarolarga beriladigan eng kam nafaqa oyiga 267 650 so‘m (hozirda 243 300 so‘m) miqdorida bo‘ladi.
* * *
Smartgov Consulting byurosi ijrochi direktori va jamoatchilik arbobi Aziza Umarova “O‘zbekiston havo yo‘llari” MAKning monopoliyasi va narxlar qimmatligi bois aholi dengizga sayohatga borolmasligi mavzuini ko‘tarib chiqdi.
“Aholining 95 foizi hayoti davomida dengizni ko‘rmay o‘tadi. Bunga kimdir o‘z hamyoni uchun ishlashni to‘xtatib, sog‘lom raqobatga ega aviatsiya bozorini qurish qiyinlik qilayotgani sabab bo‘lmoqda”, deydi Umarova. Biroq ayrim kanallar uning tanqidiga noxolis yondashdi. Umarovaning yozishicha, manfaatdor tomonlar unga qarshi kampaniya boshlagan.
Biroq uning tanqidi asosli ekani va aviakompaniyamiz narxlari haqiqatan juda balandligi barchaga ayon hisoblanadi. Xususan, bloger Umid G‘afurov shu masalaga bag‘ishlangan video chiqarib, kompaniyaning adolatsiz narx siyosatini ochib tashladi.
“Daryo” yangiliklarini kuzatib boring. O‘zbekiston va dunyo xabarlaridan eng birinchi xabardor bo‘ling.
Izoh (0)