Buxoro viloyatida 2019-yilning 6 oyi davomida Bosh prokuratura, Oliy sud, Adliya, Bandlik va mehnat munosabatlari, Uy-joy kommunal xizmat ko‘rsatish va IIV, Davyergeodezkadastr qo‘mitasi, “O‘ztransgaz” AJ , MIB hamda Markaziy bank mas’ul rahbarlari, shuningdek, hududiy sektor rahbarlari ishtirokida ommaviy sayyor qabullar tashkil etildi.
Buxoro viloyati xalq qabulxonasining “Daryo”ga ma’lum qilishicha, sayyor qabullarda jami 9295 ta masala bo‘yicha murojaat kelib tushgan.
Ushbu qabullar natijalarini sohalar kesimida qaralganda eng ko‘p murojaatlar mehnat va aholi bandligi masalalariga oid 1036 ta, gaz, elektr va suv ta’minotini yaxshilash 854 ta, uy joy, yer bilan ta’minlash 823 ta, sog‘liqni saqlash 678 ta, yo‘l qurilishi 578 ta, kommunal to‘lovlar bilan bog‘liq 565 ta, moddiy yordam, nafaqa olish masalasida 512 ta, davlat xizmatlariga taaluqli masalalar bo‘yicha 478 ta, sud masalalariga oid 456 ta, kredit olish 425 ta, ichki ishlar organlari faoliyati bilan bog‘liq 326 ta, qurilish sohasiga oid 296 ta kelib tushgan.
Ushbu qabullar jarayonida muammolarning 5159 tasi o‘z joyida, huquqiy maslahat berish orqali hal qilingan bo‘lsa, 4136 ta murojaatlarning ko‘rib chiqilishi nazoratga olingan.
Qo‘shimcha mablag‘ va vaqt talab qiluvchi 4150 ga yaqin murojaatlar, “yo‘l xaritasi”ga kiritilgan.
Izoh (0)