«Дарё» ўтаётган ҳафтада содир бўлган энг муҳим ва муҳокамали воқеаларни шарҳлаб ўтади.
Ҳафтанинг энг шов-шувли воқеаларидан бири Хотин-қизлар қўмитаси раисаси Элмира Боситхонованинг бозорчи аёллар маънавият ва маърифати ҳақидаги фикри ҳамда бозорларда радиоузел орқали шоира Зулфиянинг шеърлари ва ҳадислардан ўқиб бериш таклифи бўлди. Боситхонованинг чиқишини ижтимоий тармоқ фаоллари танқид ва истеҳзолар билан кутиб олди. Аксарият блогерлар «маънавият» атамасининг сийқаси чиқиб кетганини тилга олса, баъзилар тирикчилик қилаётган бозорчи аёлларни маънавиятсизликда айбламасдан, аввало аҳоли турмуш фаровонлигини ошириш лозимлигини таъкидлади. Ҳафта охирида Хотин-қизлар қўмитаси Боситхонованинг гапи нотўғри талқин этилаётгани ва фикр контекстдан узиб олинганини айтиб, ўз эътирозини билдирди.
* * *
Бу йил ОТМларга кириш истагидаги абитуриентлар сони ҳар йилгидан кўпроқ ва қабул жараёни қизғинроқ ўтаётгани кузатилмоқда. Жазирама об-ҳаво эса бу тадбирни ҳар икки маънода қиздирмоқда. Ўзига хос рекордлар ҳам қайд этилди, хусусан, Термизда 78 яшар отахон талаба бўлиш учун ҳужжат топширган. Давлат хизматлари марказларида ҳужжатларни 24 соат давомида қабул қилиш жорий этилди. Ҳужжат топширувчилар азбаройи кўплигидан ОТМларда абитуриентлардан ариза қабул қилишнинг сўнгги муддати узайтирилиши мумкинлиги айтилди. Айни сабабга кўра ДТМ серверида муаммо ҳам юз берди.
Бундай мислсиз чора-тадбирлар юртимизда олий маълумот олиш истагидаги ёшлар (нафақат ёшлар) сони фақат ортаётгани ва талаб-таклиф ўзаро номутаносиблигини англатади.
* * *
Ўзбекистон 2019 йилда газ экспорти ҳажмини ўтган йилга нисбатан 15 фоизга ошириши тўғрисида «Ўзбекнефтгаз» АЖ маълум қилди. Бироқ ижобий мазмундаги хабар ҳам бор: энди газни аҳолига хусусий операторлар сотиши мумкин бўлади. Шавкат Мирзиёев 9 июлда имзолаган қарорда бу соҳага давлат-хусусий шериклик тамойилларини киритишни Энергетика вазирлигига топширган. Бу газ таъминотини молиявий соғломлаштириш сари қадам деб баҳоланмоқда.
* * *
Бундан аввалги хабаримиз «Ўзбекнефтгаз» АЖда ўтказилаётган ислоҳотларнинг бир қисми эди. Президент қарорига мувофиқ, «Ўзбекнефтгаз» АЖ учга бўлинди. Энди у тизимни бошқаради, табиий газни қазиб олади ва қайта ишлайди, «Ўзтрансгаз» газ етказиб беради, «Ҳудудгазтаъминот» ҳудудий газ тақсимлаш тармоқларини эксплуатация қилади ва суюлтирилган газни аҳолига сотади. Бундан ташқари бошқарув тизимини такомиллаштиришга доир бошқа ўзгаришлар ҳам амалга оширилади.
* * *
Ҳафта бошида кутилмаганда 1 килограмм гўшт нархи 60 минг сўмгача кўтарилиши кузатилди. Бунинг сабаби ем ва озуқа нархининг ошиши деб талқин этилмоқда. Бироқ расмийлар бозордаги нархга аралашиб, сунъий равишда пасайтиришга уринаётгани ҳақидаги хабарлар тарқала бошлади. Давлат статистика қўмитасининг ахборотига ишонадиган бўлсак, 2019 йил 9 июль ҳолатига кўра бозорда мол гўшти (суйакциз гўштидан ташқари) – 28 000 сўмдан 48 000 сўмгача сотилади.
* * *
Жиззах вилоятида қурилаётган атом электр станциясига қарама-қарши муносабатлар билдирилмоқда. Шунга қарамасдан, ўзбек АЭСининг яна иккита энергоблоки қурилиши эълон қилинди. Қонунчилик палатаси спикери ўринбосари Борий Алихонов АЭСимиз 9 балли зилзилага ҳам бардош бериши ва устига самолёт қулаганда ҳам бемалол ишлайверишини таъкидлаб аҳолини кўнгилни тўқ қилишга чақирди. АЭС номи Ўзбекистон деб аталиши мумкин. АЭС ишга тушгач Фориш туманидаги 2,5 минг киши иш билан таъминланади. Ўзбек АЭСи яқинида 50 минг кишига мўлжалланган атомчилар шаҳри қурилади.
* * *
Ушбу ҳафтада иккита газ кони очилди. Бири Андижон вилоятидаги Чақар кони бўлса, иккинчиси Мўйноқдаги Оралиқ конидир. Чақарда 1710 метр чуқурликдан суткасига 300 минг метр куб газ олинмоқда. Оралиқда эса 3910 метрдан суткасига 700–800 минг метр куб газ чиқмоқда. Бир ҳафтада «Ўзбекнефтгаз» иккита кон очиши кам учрайдиган қувончли ҳодисадир. Ўзбекистон газ қазиб олиш бўйича дунёда 10–12 ўринларда туради.
* * *
Гарчи янгиликлар сирасига мансуб бўлмаса ҳам. ўқилиши лозим бўлган суҳбат-мақолани дайжестимизга қўшдик. Гап илгари Вазирлар Маҳкамаси раисининг биринчи ўринбосари бўлиб ишлаган Исмоил Жўрабековнинг Ҳайратон кўприги портлатилмай қолгани ҳақидаги хотиралари тўғрисида бормоқда. Ушбу мақола сайтларда энг кўп ўқилганлар рўйхатида кўринди. Исмоил Жўрабековнинг айтишича, мустақилликнинг дастлабки йилларида қўшни Афғонистонда толиблар ҳокимиятни олган ва натижада минглаб қочқинлар Ўзбекистондан паноҳ топиш илинжида кўприкдан ўтишни истаган. Бироқ марҳум президент Ислом Каримов мамлакат тинчлиги учун қочқинларни ўтказмасдан, кўприкни портлатишни буюрган. Исмоил Жўрабеков шундай мураккаб вазиятда қочқинларни мамлакат ичкарисига қайтаришнинг имконини қилган, қочқинларга таҳдид солган қуролли жангарилар билан музокара ўтказиб уларни шаштидан туширган ҳамда кўприкни асраб қолган.
* * *
1 августдан ойликлар 10 фоизга оширилиб, ЭКИҲ 223 минг сўмга етади (ҳозир 202 730 сўм). Энг кам ёшга доир пенсиялар ва болаликдан ногиронларга бериладиган нафақа – ойига 436 150 сўм (ҳозирда 396500 сўм); зарур иш стажига эга бўлмаган кекса ёшдаги ва меҳнатга лаёқатсиз фуқароларга бериладиган энг кам нафақа ойига 267 650 сўм (ҳозирда 243 300 сўм) миқдорида бўлади.
* * *
Smartgov Consulting бюроси ижрочи директори ва жамоатчилик арбоби Азиза Умарова «Ўзбекистон ҳаво йўллари» МАКнинг монополияси ва нархлар қимматлиги боис аҳоли денгизга саёҳатга боролмаслиги мавзуини кўтариб чиқди.
«Аҳолининг 95 фоизи ҳаёти давомида денгизни кўрмай ўтади. Бунга кимдир ўз ҳамёни учун ишлашни тўхтатиб, соғлом рақобатга эга авиация бозорини қуриш қийинлик қилаётгани сабаб бўлмоқда», дейди Умарова. Бироқ айрим каналлар унинг танқидига нохолис ёндашди. Умарованинг ёзишича, манфаатдор томонлар унга қарши кампания бошлаган.
Бироқ унинг танқиди асосли экани ва авиакомпаниямиз нархлари ҳақиқатан жуда баландлиги барчага аён ҳисобланади. Хусусан, блогер Умид Ғафуров шу масалага бағишланган видео чиқариб, компаниянинг адолатсиз нарх сиёсатини очиб ташлади.
«Дарё» янгиликларини кузатиб боринг. Ўзбекистон ва дунё хабарларидан энг биринчи хабардор бўлинг.
Изоҳ (0)