Yong‘in tufayli Sudochye ko‘liga ham va unga yaqin bo‘lgan hudud aholisiga ham zarar yetmagan

Qoraqalpog‘iston Ekologiya va atrof-muhitni muhofaza qilish qo‘mitasining maxsus ishchi guruhi tomonidan voqea o‘rganilganda yong‘in Sudochye ko‘liga ham unga yaqin hududda joylashgan Qorajar ovuli aholisiga ham zarar yetkazmaganligi aniqlangan, deb yozadi O‘zA

Ma’lum qilinishicha, Yong‘in Sudochye ko‘llar tizimining  “Qoraterang” bo‘limida kuchli momoqaldiroq va chaqmoq chaqishi natijasida yong‘in sodir bo‘lgan. Shamol natijasida atrofdagi qamishzorlarga tarqalgan.

Yong‘in ko‘l o‘rtasidagi orolchalarda yuz berganligi sababli uni o‘z vaqtida o‘chirishning imkoni bo‘lmagan. 4-iyul sanasida boshlangan yong‘in 6-iyul kuni soat chamasi 23:00da bartaraf etilgan.

“Biroq 50 ming gektardan iborat Sudochye ko‘llar tizimidagi hayvonot dunyosi ham unga yaqin bo‘lgan Qorajar ovuli aholisi ham yong‘indan zarar ko‘rmagan”, — deb yoziladi xabarda.

Avvalroq yong‘in natijasida shu hududdagi jami 278 gektar qamishzor yonganligi haqida ma’lum qilingan.