Qamashilik alimentdan qarzdor ota D.T.ning 2 bosh oti MIB tomonidan xatlangach, bir nafar farzandi ta’minoti uchun to‘lab berishi kerak bo‘lgan 11 million 734 ming 480 so‘m to‘liq to‘lab berildi. Bu haqda “Daryo”ga MIB Qashqadaryo viloyat boshqarmasi matbuot xizmati xabar bermoqda.
MIB matbuot xizmati xabariga ko‘ra, fuqarolik ishlari bo‘yicha G‘uzor tumanlararo sudining 2013-yil 3-apreldagi qaroriga asosan fuqaro D.T.dan undiruvchi S.Q. foydasiga bir nafar farzandining moddiy ta’minoti uchun D.T.ning har oylik ish haqi va boshqa daromadlarining 25 foizi miqdorida aliment undirish belgilangan. Ammo fuqaro shu vaqtga qadar umuman aliment to‘lamagan. Ijro harakatlari davomida qarzdor D.T.ning 2016-yil 2-yanvargacha bo‘lgan qarzdorligi 11 million 734 ming 480 so‘m ekanligi ma’lum bo‘lgan. Bu davr mobaynida qarzdorning qarzdorligi haqida tegishli tashkilotlarga muntazam so‘rovnomalar yuborilgan bo‘lsa-da, qarzdor D.T. nomida hech qanday mol-mulklar yo‘qligi aniqlangan.
2019-yilning 28-iyunida D.T.ning yashash xonadoni hamda yordamchi xo‘jaliklari qayta ko‘zdan kechirilganda, bolali to‘riq qashqa oti mavjudligi aniqlanadi. Mazkur vaziyatda Byuroning Qamashi tuman bo‘limi davlat ijrochilari ikki bosh otni xatlash to‘g‘risida dalolatnoma rasmiylashtirib, tegishli tartibda realizatsiya qilish uchun olib ketadi. Qarzdor D.T. esa bu vaziyatda otidan ajralib qolmaslik uchun 11 734 480 so‘m pulni topib, alimentdan bo‘lgan qarzdorligini to‘liq qopladi. Shuningdek, aliment pulini o‘z vaqtida to‘lab borishga va’da berdi.
Izoh (0)