UFC’ning sobiq yengil vazn (-70 kg) chempioni, braziliyalik Charlz Oliveyra ispan-gruzin jangchisi Iliya Topuriya va rossiyalik Arman Sarukyan o‘rtasidagi ehtimoliy titul jangi haqida o‘z fikrini bildirib o‘tdi.
Uning fikricha, mazkur qarama-qarshilikda Topuriyaning g‘alaba qozonish imkoniyati yuqori:
Arman — juda xavfli va juda chidamli yigit. Lekin, rostini aytsam, bu ehtimoliy jangda Topuriyaning g‘alaba qozonish imkoniyati ko‘proq, deb hisoblayman. Ammo, shuni ham ta’kidlash kerakki, agar bu jang tashkil qilinsa, UFC tarixidagi eng qiziqarli bellashuvlardan biri bo‘lishi aniq, — dedi Oliveyra Thunderpick nashriga bergan intervyusida.
Ma’lumot uchun, 28 yoshli Arman Sarukyan professional faoliyatini 2015-yilda boshlagan. U 2019 yildan buyon UFC’da jang qilib keladi. Arman ushbu promoushendagi faoliyati davomida jami 11 ta jang o‘tkazib, ularning 9 martasida g‘alaba qozongan bo‘lsa, 2 bahsda imkoniyatni boy bergan.
Topuriya esa ushbu vazn toifasida chempion hisoblanadi. U joriy yilning 29 iyun kuni Las-Vegasda bo‘lib o‘tgan UFC 317 musobaqasida Charlz Oliveyrani nokautga uchratib, UFC yengil vazn toifasining yangi chempioniga aylandi. Sarukyan esa ushbu kamar uchun asosiy da’vogarlardan biri bo‘lib turibdi.
Izoh (0)