Iroqda eronlik ziyoratchilarni olib ketayotgan avtobus halokatga uchradi. Hodisa oqibatida besh kishi halok bo‘ldi, 57 kishi jarohatlandi. Bu haqda Iran International xabar berdi.
Avtohalokat Basra–Shalamcheh yo‘nalishida yuz bergan. Ziyoratchilar Arbain marosimiga yo‘l olgan. Yo‘l transport hodisasi avtobusning yo‘l chetidagi to‘siqqa urilishi sababli yuz bergan. Eron Qizil yarim oy jamiyati voqea joyiga 10 ta tezkor guruh yuborgan.
Bu bir hafta ichida Iroqda ziyoratchilar ishtirokida sodir bo‘lgan ikkinchi yirik hodisa. 10-avgust kuni Najaf va Karbalo shaharlarini bog‘lovchi yo‘l bo‘yidagi suv tozalash inshootidagi nosozlik sabab havoga xlor gazi sizib chiqqandi. Oqibatda 600 dan ortiq ziyoratchi nafas qisishi belgisi bilan shifoxonaga yotqizilgan. Ularning barchasiga tibbiy yordam ko‘rsatilgan va sog‘ayganidan so‘ng uylariga javob berilgan.
Shalamcheh esa Eron va Iroq o‘rtasidagi rasmiy xalqaro chegara punkti bo‘lib, Xurramshahr shahridan 15 kilometr g‘arbda joylashgan. Arbain davrida bu punkt muqaddas qadamjolarga boruvchi ziyoratchilar uchun eng gavjum o‘tish joylaridan biridir.
Izoh (0)