Surxondaryo viloyati hokimi To‘ra Bobolov tomonidan haftaning har yakshanba kuni olis va chekka, aholi zich yashaydigan hududlarda sayyor qabullar o‘tkazilmoqda. Bu haqda hokimlik matbuot xizmati xabar berdi.
Navbatdagi sayyor qabul 7-iyul kuni Denov tumanining viloyat markazidan qariyb 200 kilometr uzoqlikda joylashgan tog‘li O‘shor qishlog‘ida tashkil etilgan. Unda fuqarolarning murojaatlari, masalalarini ko‘rib chiqish va hal etish uchun viloyat, tuman hokimliklari mutasaddilari, sektor, idora va tashkilot rahbarlari, Xalq qabulxonasi vakillari jalb etilgan.
Borish qiyin bo‘lgan tog‘li O‘shor qishlog‘ida 4 ming nafarga yaqin aholi istiqomat qiladi. Uning 50 foizini yoshlar tashkil etadi. Sayyor qabulda odamlar o‘tgan 28 yil davomida birinchi marotaba bu qishloq muammolarini o‘rgangani kelgan viloyatning yangi hokimiga hududdagi mavjud muammolarni bayon qilgan.
O‘shorliklar va ularga qo‘shni bo‘lgan qishloqlar aholisidan 100 dan ziyod murojaatlar tushgan. Ularning aksariyati aholini ko‘pdan buyon qiynab kelayotgan muammolar, xususan, yo‘l, qishloq vrachlik punkti, maktabgacha ta’lim muassasasi qurilishi, elektr energiya ta’minotini yaxshilash bilan bog‘liq masalalardir.
Muloqot davomida fuqarolardan tushgan murojaatlarning 27 tasi joyida hal etilgan. Muddat talab etadigan 76 ta murojaat nazoratga olinib, unda ko‘tarilgan masalalarning ijobiy yechimi bo‘yicha chora-tadbirlar belgilandi. Sayyor qabul munosabati bilan viloyat markazidan jalb etilgan malakali mutaxassis shifokorlar tomonidan bepul tibbiy ko‘rik ham tashkil etilgan.
Izoh (0)