Сурхондарё вилояти ҳокими Тўра Боболов томонидан ҳафтанинг ҳар якшанба куни олис ва чекка, аҳоли зич яшайдиган ҳудудларда сайёр қабуллар ўтказилмоқда. Бу ҳақда ҳокимлик матбуот хизмати хабар берди.
Навбатдаги сайёр қабул 7 июль куни Денов туманининг вилоят марказидан қарийб 200 километр узоқликда жойлашган тоғли Ўшор қишлоғида ташкил этилган. Унда фуқароларнинг мурожаатлари, масалаларини кўриб чиқиш ва ҳал этиш учун вилоят, туман ҳокимликлари мутасаддилари, сектор, идора ва ташкилот раҳбарлари, Халқ қабулхонаси вакиллари жалб этилган.
Бориш қийин бўлган тоғли Ўшор қишлоғида 4 минг нафарга яқин аҳоли истиқомат қилади. Унинг 50 фоизини ёшлар ташкил этади. Сайёр қабулда одамлар ўтган 28 йил давомида биринчи маротаба бу қишлоқ муаммоларини ўргангани келган вилоятнинг янги ҳокимига ҳудуддаги мавжуд муаммоларни баён қилган.
Ўшорликлар ва уларга қўшни бўлган қишлоқлар аҳолисидан 100 дан зиёд мурожаатлар тушган. Уларнинг аксарияти аҳолини кўпдан буён қийнаб келаётган муаммолар, хусусан, йўл, қишлоқ врачлик пункти, мактабгача таълим муассасаси қурилиши, электр энергия таъминотини яхшилаш билан боғлиқ масалалардир.
Мулоқот давомида фуқаролардан тушган мурожаатларнинг 27 таси жойида ҳал этилган. Муддат талаб этадиган 76 та мурожаат назоратга олиниб, унда кўтарилган масалаларнинг ижобий ечими бўйича чора-тадбирлар белгиланди. Сайёр қабул муносабати билан вилоят марказидан жалб этилган малакали мутахассис шифокорлар томонидан бепул тиббий кўрик ҳам ташкил этилган.
Изоҳ (0)