Davlat rahbarining shu yil Surxondaryo viloyatiga tashrifi davomida bildirgan taklifiga binoan, Veterinariya va chorvachilikni rivojlantirish davlat qo‘mitasi raisi B.Norqobilov boshchiligidagi mamlakatimiz veterinar va chorvadorlaridan iborat delegatsiya Mo‘g‘uliston Respublikasida safarda bo‘ldi, bu haqda O‘zA xabar qiladi.
Tashrif mobaynida Mo‘g‘uliston Respublikasining veterinariya va chorvachilik sohasidagi tajribalarini o‘rganish, mamlakat iqlimiga mos yo‘nalishlarni amaliyotga tatbiq etish masalalari ko‘rib chiqildi. Shuningdek, go‘sht va go‘sht mahsulotlari hamda mayda va yirik shoxli mollarning xususiyatlari bilan bevosita tanishildi. Ikki davlat tadbirkorlari o‘rtasida chorvachilik mahsulotlari oldi-sotdi jarayonlarini amalga oshirishga keng sharoitlar yaratish muhokama qilindi.
Mo‘g‘uliston Prezidentining xalqaro siyosat bo‘yicha maslahatchisi Tengshjargal Tyumen, Oziq-ovqat, qishloq xo‘jaligi va yengil sanoat vazirining o‘rinbosari Sauli Janimxan, Veterinariya agentligi rahbari Tyumendemberel Dorniyam, Mo‘g‘uliston milliy rivojlanish Agentligi qoshidagi Investitsiya markazi direktori Dashdemberel Natsagdori kabi hukumat vakillari bilan uchrashuv chog‘ida ikki tomonlama hamkorlikning samaradorligi va istiqboldagi rejalar bo‘yicha kelishuvlar keng muhokama qilindi.
Shuningdek, safar davomida Mo‘g‘uliston milliy savdo-sanoat palatasi hamda yirik ishlab chiqarish kompaniyalari vakillari bilan qator uchrashuvlar tashkil etildi.
Bundan tashqari, O‘zbekiston delegatsiyasi mutaxassislari chorvachilik mahsulotlari ishlab chiqaruvchi korxonalar, go‘sht kombinatlari hamda xo‘jaliklarda bo‘lib, bu boradagi tajribalarni o‘rgandi.
“Mo‘g‘uliston tomoni yurtimizning g‘arbiy o‘lkasi hisoblangan Xovd shahridan logistik markaz sifatida foydalanishni taklif qiladi. Yurtingizga go‘sht mahsulotlarini eksport qilish uchun transport koridori yaratishda, chorva mahsulotlarini havo yo‘li orqali yuborish hamda ushbu yo‘nalish orqali O‘zbekistondan meva-sabzavot mahsulotlarini bizga yetkazib berish, shuningdek, chorva mahsulotlari bilan savdo-sotiq qilishda bu joy qulay hudud sanaladi”, — deydi Mo‘g‘uliston prezidentining xalqaro siyosat bo‘yicha maslahatchisi Tengshjargal Tyumen muloqot chog‘ida.
Maslahatlashuvlar yakunida O‘zbekiston va Mo‘g‘uliston davlatlari o‘rtasida yirik va mayda shoxli mollar hamda ot go‘shtini eksport va import qilish bo‘yicha xalqaro veterinariya sertifikati, tirik hayvonlarni eksport va import qilish bo‘yicha kelishuv, veterinariya xizmatlari hamkorligini kengaytirish, epizootik monitoring va laboratoriya tashxislari, ma’lumot almashish hamda malaka oshirish bo‘yicha kelishuv, har ikki davlat kompaniyalari o‘rtasida savdo sotiq qilish bo‘yicha memorandum imzolandi.
Izoh (0)