Namanganda Yoshlar kuni tantanalari viloyat markazidagi “Afsonalar vodiysi” parki amfiteatrida bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Tantanali tadbirda viloyat hokimi Xayrullo Bozorov Shavkat Mirziyoyevning O‘zbekiston yoshlariga bayram tabrigini o‘qib berdi.
“Mard o‘g‘lon” davlat mukofoti bilan taqdirlangan Kosonsoy tumanidagi bolalar va o‘smirlar sport maktabi murabbiyi Muhammadsiddiq Abdumutalov va Norin tumanidagi “Omadbek bo‘stoni” fermer xo‘jaligi boshlig‘i Temurbek Mo‘minovga diplom hamda ko‘krak nishonlari topshirildi.
Adabiyot, san’at, sport va boshqa yo‘nalishlarda yil davomida turli yutuqlarni qo‘lga kiritgan iqtidor egalariga diplom va qimmatbaho sovg‘alar taqdim etildi.
“Hokim va yoshlar” uchrashuvida viloyat hokimi tomonidan Yoshlar ittifoqi viloyat kengashiga avtobus sovg‘a qilish va’dasi berilgandi. Tadbirda viloyat kengashiga va’da qilingan avtobus topshirildi.
“Yoshlar bandligini ta’minlash bo‘yicha eng namunali tuman (shahar) hokimi” tanlovi mamlakat bosqichi g‘oliblari deb topilgan Namangan shahri hokimi Shavkat Abdurazzoqov va To‘raqo‘rg‘on tumani hokimi G‘ulomjon Murodxo‘jayev diplom va O‘zbekiston yoshlar ittifoqining ramziy mukofoti bilan taqdirlandi.
Tantanali tadbir san’at ustalarining gala-konserti bilan yakunlandi.
Izoh (0)