Aziz Muhitdinov Toshkentdagi Amiti universiteti rektori vazifasini bajaruvchi etib tayinlandi. Bu haqda AKT vazirligi axborot xizmati xabar berdi.
Aziz Muhitdinov bunga qadar Unicon.uz korxonasida AKTni rivojlantirish va joriy qilish bo‘yicha direktorning birinchi o‘rinbosari lavozimida ishlab kelayotgan edi.
Aziz Muhitdinov 1985-yili Toshkent shahrida tug‘ilgan. 2009-yilda M.A. Bonch-Bruyevich nomidagi Sankt-Peterburg davlat telekommunikatsiyalar universitetini tamomlagan. U AKT vazirligi, “O‘zbektelekom” aksiyadorlik kompaniyasi tizimida turli vazifalarda, shuningdek Uzinfocom markazida direktor vazifasini bajaruvchi lavozimida ham ishlagan.
Eslatib o‘tamiz, ATK vazirligi hamda Hindistonning Amiti universiteti hamkorligida Toshkent shahrida Amiti universiteti tashkil etilgandi.
O‘zbekiston Prezidentining 2019-yil 7-yanvardagi qaroriga muvofiq, Toshkent shahridagi Amiti universiteti 2019-yilning sentabr oyidan o‘quv yilini ochadi. Oliy ta’lim muassasasi axborot-kommunikatsiya texnologiyalari, jumladan, kompyuter va dasturiy injiniring, sun’iy intellekt va menejment sohalarida mutaxassislar tayyorlaydi.
Ma’lumot uchun, Amiti universiteti Hindistonda yetakchi xususiy oliy ta’lim muassasasi hisoblanib, unda 150 mingda ziyod talaba tahsil oladi. Ta’lim muassasasining bosh korpusi Noida shahrida joylashgan bo‘lib, uning 11 ta shaharda kampuslari mavjud. Shuningdek, Nyu-York, London, Dubay, Singapur, Xitoy, JAR va jahonning boshqa shaharlarida filiallari faoliyat yuritadi.
Izoh (0)