Азиз Муҳитдинов Тошкентдаги Амити университети ректори вазифасини бажарувчи этиб тайинланди. Бу ҳақда АКТ вазирлиги ахборот хизмати хабар берди.
Азиз Муҳитдинов бунга қадар Unicon.uz корхонасида АКТни ривожлантириш ва жорий қилиш бўйича директорнинг биринчи ўринбосари лавозимида ишлаб келаётган эди.
Азиз Муҳитдинов 1985 йили Тошкент шаҳрида туғилган. 2009 йилда М.А. Бонч-Бруевич номидаги Санкт-Петербург давлат телекоммуникациялар университетини тамомлаган. У АКТ вазирлиги, «Ўзбектелеком» акциядорлик компанияси тизимида турли вазифаларда, шунингдек Uzinfocom марказида директор вазифасини бажарувчи лавозимида ҳам ишлаган.
Эслатиб ўтамиз, АТК вазирлиги ҳамда Ҳиндистоннинг Амити университети ҳамкорлигида Тошкент шаҳрида Амити университети ташкил этилганди.
Ўзбекистон Президентининг 2019 йил 7 январдаги қарорига мувофиқ, Тошкент шаҳридаги Амити университети 2019 йилнинг сентябрь ойидан ўқув йилини очади. Олий таълим муассасаси ахборот-коммуникация технологиялари, жумладан, компьютер ва дастурий инжиниринг, сунъий интеллект ва менежмент соҳаларида мутахассислар тайёрлайди.
Маълумот учун, Амити университети Ҳиндистонда етакчи хусусий олий таълим муассасаси ҳисобланиб, унда 150 мингда зиёд талаба таҳсил олади. Таълим муассасасининг бош корпуси Ноида шаҳрида жойлашган бўлиб, унинг 11 та шаҳарда кампуслари мавжуд. Шунингдек, Нью-Йорк, Лондон, Дубай, Сингапур, Хитой, ЖАР ва жаҳоннинг бошқа шаҳарларида филиаллари фаолият юритади.
Изоҳ (0)