Samarqand shahar hokimi o‘rinbosari Rustam Qobilov tomonidan e’lon qilingan universitet xiyobonini yangilash loyihasi ijtimoiy tarmoqlarda aholi tanqidi va ko‘plab munozaralarga sabab bo‘ldi, deb xabar berdi Sputnik.
Bunga javoban Rustam Qobilov blogerlarni 16-iyun kuni soat 17:00 da universitet xiyoboniga uchrashuvga taklif qildi.
Hokimiyat xiyobonda birorta ham daraxt kesilmaydi, deb va’da berishiga qaramasdan, mahalliy aholi yangi loyiha bahonasida daraxtlar kesilishidan xavotirda.
“Samarqand va Samarqandliklar” guruhi a’zosi Yelena Baroninaning yozishicha, loyihada ko‘rsatilgan velosiped yo‘laklarini qurish uchun kamida bir qator daraxtlarni kesish kerak.
“Velosiped yo‘laklari qurish – bu albatta yaxshi ish, lekin allaqachon obod bo‘lgan xiyobon o‘rniga emas. Buning uchun Samarqandda yangilash va obodonlashtirish kerak bo‘lgan joylar juda ko‘p”, - deb yozgan Viktor Drago ismli foydalanuvchi.
“Veloyo‘lakchani universitet xiyobonida qurish - ko‘zbo‘yamachilik. Prezident ham shu yerdan o‘tadi, Samarqandga kelayotgan hamma mehmonlar ham albatta shu xiyobondan o‘tadi. Hokimiyat buni biladi. Shuning uchun ham aynan shu yerda ish ko‘rsatmoqchi xolos. Ular shu bilan boshka joyda veloyo‘lakcha ham, spot maydonchalari ham qurmaydi”, - deb yozgan Farruh ismli foydalanuvchi.
“Jazirama saraton kunida hech qanday velosiped yo‘lagi ham, trenajerlar ham issiqdan saqlay olmasligini barcha yaxshi tushunadi albatta. Undan tashqari Toshkent markazidagi Amir Temur xiyobonining oldingi va hozirgi holati ham ko‘pchilik uchun yaxshi ‘dars’ bo‘lgan. Bir vaqtlar yam-yashil daraxtlar soyasi ostida bo‘lgan Farg‘ona shahri esa 80% daraxtlaridan mahrum bo‘lgan”, — deyiladi xabarda.
Ayni damda samarqandliklar #nashBulvar xeshtegi ostida bulvarni va uning 100 yillik azim daraxtlarini himoya qiluvchi xabarlar qoldirmoqda.
Izoh (0)