2017-yildan boshlab Qorako‘l tuman IIB HPB profilaktika inspektori lavozimida ishlab kelgan olotlik fuqaro Nurali Bekov xizmat vazifasidan foydalanib, tamagirlik yo‘li bilan pora olish jinoyatini sodir qilgan. Jinoyat ishlari bo‘yicha Qorako‘l tuman sudi raisi Jalol Sadirovning “Daryo”ga ma’lum qilishicha, Nurali Bekov jinoyat ustida qo‘lga olinib, unga nisbatan ozodlikdan mahrum etish jazosi qo‘llanilgan.
Holatga ko‘ra, 2018-yilning dekabr oyida Qorako‘l tumanidagi “Diyor” choyxonasiga ovqatlangani kelgan fuqarolar G‘.A. va E.R. spirtli ichimlik iste’mol qilgan. Oqibatda kafe ishchisi N.T. ismli ayol bilan janjal sodir qilgan. G‘.A. ayolni haqoratlagan va urgan. Ushbu yuzasidan N.T. tumandagi “Paxtakor” mahalla fuqarolar yig‘ini, “Gulobod” ko‘chasida joylashgan ichki ishlar organlari tayanch punktiga borgan va IIB HPB profilaktika inspektori Nurali Bekovga shikoyat arizasini qoldirgan. Inspektor xizmat vazifasi va O‘zbekiston Respublikasi MJTKning talabiga ko‘ra, ma’muriy huquqbuzarlik sodir etgan shaxsga nisbatan bayonnoma yuritib, hujjatlarni belgilangan tartibda va muddatda sudga jo‘natishi lozim bo‘lgan. Biroq g‘araz yo‘l bilan javobgar tomondan 400 ming so‘m undirish maqsadida ish yurituvidagi 2018-yil 8-dekabrda tuzilgan ma’muriy bayonnomani 2019-yil 17-yanvar kuniga qadar sudga topshirmagan.
Ma’muriy bayonnoma bo‘yicha O‘zbekiston Respublikasi MJTKning 183-moddasi (Mayda bezorilik) bilan javobgarlikka tortilayotgan G‘.A.ga, “Agar 400 ming so‘m pul bersang, jabrlanuvchidan da’vosi yo‘qligi to‘g‘risida ariza olaman, yo‘qsa, ishni sudga taqdim qilaman. Sud qaroriga ko‘ra, 15 sutkaga qamalasan”, — deya qo‘rqitib, uni pora berishga majbur qilib kelgan.
Kam ta’minlangan va nochor fuqaro IIB HPB profilaktika inspektori talab qilayotgan pulni to‘play olmagan. Nurali Bekov qayta-qayta qo‘ng‘iroq qilib, 400 000 so‘m miqdoridagi pulni talab qilib chaqiravergach, G‘.A. uning xizmat xonasiga kelib, o‘zining Toshkentga pul ishlash uchun ketganini, biroq yetarlicha mablag‘ to‘play olmaganini tushuntirgan. Nurali Bekov esa o‘z xizmat xonasi derazasi oynasiga parda o‘rnatishini va pulini to‘lashni esa G‘.A. zimmasiga “yuklagan”.
Oradan bir necha kun o‘tgach, inspektor xodimi G‘.A.ga yana qo‘ng‘iroq qilib, o‘z xizmat xonasi derazasiga parda o‘rnatgani va zudlik bilan kelib, uning pulini to‘lab ketishini talab qila boshlagan. O‘zi va oilasini boqish uchun topayotgan xarajatidan orttira olmayotgan fuqaro G‘.A. inspektor talab qilayotgan 400 000 so‘m miqdoridagi pulni to‘play olmagach, DXX Olot tuman bo‘linmasi boshlig‘i nomiga holat yuzasidan ariza yozishga majbur bo‘lgan. 2019-yilning 15-yanvar kuni ushbu ariza yuzasidan DXX va IIB xodimlari tomonidan nazorat tariqasida G‘.A.ga 200 ming so‘m pul berilgan. Javobgar shaxs bu pullarni IIB profilaktika inspektori Nurali Bekovning xizmat xonasiga olib borgan. Biroq Nurali Bekov “Bu pullaringni olmayman, 400 ming so‘mni to‘liq qilib kelmasang, 15 sutkaga qamalasan!” — degan tahdid va qo‘rqituv bilan o‘zining xizmat xonasidan chiqarib yuborgan.
Shundan so‘ng tuman IIB, prokuratura va DXX xodimlari hamkorligida tezkor tadbir o‘tkazilib, javobgar shaxsga kimyoviy ishlov berilgan 400 ming so‘m pullar berilgan. IIB HPB profilaktika inspektori Nurali Bekov G‘.A.ni pora berishga majbur etadigan sharoitga qasddan undovchi xatti-harakati bilan jinoyat ustida qo‘lga olingan.
2019-yilning 25-may kuni jinoyat ishlari bo‘yicha Qorako‘l tuman sudi hukmiga ko‘ra, sudlanuvchi Nurali Bekov O‘zbekiston Respublikasi Jinoyat Kodeksi 210-moddasi 2-qismining “v” bandi (Tamagirlik yo‘li bilan pora olish) bilan aybdor deb topilgan. Unga nisbatan Jinoyat Kodeksi 57-moddasini qo‘llanilib, 2 yil muddatga moddiy javobgarlik va mansabdorlik lavozimlarida ishlash huquqidan mahrum etilib, 3 yil 6 oy muddatga ozodlikdan mahrum qilish jazosi tayinlangan.
Izoh (0)