KAMKA — 2019: Mintaqaviy hamkorlikni rivojlantirish imkoniyatlari muhokama qilindi

13-iyun kuni Toshkentda “Markaziy Osiyo, Mongoliya, Kavkaz va Afg‘oniston” mintaqaviy forum boshlandi, deb xabar berdi O‘zA.

AQShning Jon Xopkins universiteti qoshidagi Markaziy Osiyo va Kavkaz instituti hamda Ramsfeld fondi hamkorligida tashkil etilgan tadbirda O‘zbekiston Oliy Majlis Senati a’zolari, tegishli vazirlik va idoralarning mas’ul vakillari, dunyoning 20 mamlakatidan kelgan 300 dan ortiq mehmonlar, xalqaro tashkilot va institut vakillari ishtirok etmoqda.

Tadbirning ochilish marosimida Oliy Majlis Senati raisining birinchi o‘rinbosari Sodiq Safoyev, Jon Xopkins universiteti qoshidagi Markaziy Osiyo va Kavkaz instituti raisi F.Starr, KAMKA’ning O‘zbekistondagi milliy muvofiqlashtiruvchisi M. Muxitdinovlar so‘zga chiqdi.

Mintaqaviy forum 2004-yilda Markaziy Osiyo va Kavkaz mamlakatlarinign ijtimoiy-iqtisodiy rivojlanishiga oid masalalari bo‘yicha fikr almashish platformasi sifatida tashkil etilgan. Forum hech qanday siyosiy maqsadlarni ko‘zlamaydi.

Forumning birinchi kunida mintaqaviy savdo, transport-tranzit tizim, sarmoya jalb etish, iqtisodiy va biznes-aloqa munosabatlarini mustahkamlash, ta’lim, turizm, OAV va boshqa ko‘plab sohalar faoliyatini rivojlantirish masalalari bo‘yicha munozaralar o‘tkazildi.