Bir necha yildan buyon farzandi uchun aliment puli to‘lashdan qasddan bo‘yin tovlab kelgan Buxoro tumanilik fuqaro Q.H. 9 200 000 so‘mni to‘lagach, o‘ziga nisbatan qo‘llanilgan qamoq jazosidan ozod qilindi. Bu haqda Jinoyat ishlari bo‘yicha Buxoro tuman sudi raisi Nozim Jo‘rayev ma’lum qildi.
Sudga ko‘ra, Q.H. 2017-yil 27-maydan 2018-yil 27-iyulga qadar aliment pullarini to‘lashdan bo‘yin tovlab kelgan. Shaxsiy kafillik ehtiyot chorasi talablarini buzganligi va yetkazilgan zararni qoplamaganligi va qasddan bo‘yin tovlab kelgani sababli, unga nisbatan qamoqqa olish tarzidagi ehtiyot chorasi qo‘llanilgan. 2019-yil 23-maydan boshlab, qamoqda saqlangan.
Majburiy ijro byurosi Buxoro tuman bo‘limi davlat ijrochisining aliment qarzini hisoblash to‘g‘risidagi qaroriga asosan, Q.H.ning aliment to‘lovidan qarzi 9 170 108 so‘mni tashkil qilishi aniqlangan. Jinoyat ishi qo‘zg‘atilib, ish sudga yuborilgan.
Sud majlisining tayyorlov qismida Q.H.ning yaqin qarindoshlari tomonidan jabrlanuvchi M.I.ga yetkazilgan 9 200 000 so‘m zarar to‘liq qoplangan. Jinoyat kodeksi 122-moddasining 3-qismiga muvofiq (shaxs aliment majburiyatlari bo‘yicha qarzdorlikni to‘liq to‘lagan bo‘lsa, u javobgarlikdan ozod qilinishi belgilangan), qamoqdan ozod qilingan.
Bundan ilgari ham Q.H. jinoyat ishlari bo‘yicha Buxoro tuman sudining 2018-yil 27-sentabrdagi qarori va O‘zbekiston Respublikasi MJtKning 474-moddasiga asosan, aynan shu masalada 15 sutka ma’muriy qamoq jazosini o‘tab chiqqan.
Izoh (0)