“Daryo” jahon matbuotida oxirgi kunlarda ko‘tarilgan asosiy mavzularga to‘xtalib o‘tadi.
Italyan siyosiy partiyalarini ruslar boqadimi?
6-mart sanasida Le Figaro nashri qiziqarli bir mavzuni ko‘tarib chiqdi. Maqola mualliflari jurnalist Jovanni Titsian va Stefano Verjine “Shimol ligasi” konservativ partiyasining yetakchisi va partiya xarajatlarini Kreml ko‘tarayotgan bo‘lishi mumkinligi haqida maqola chop etdi.
Xususan, maqolada partiya fiktiv dizel yoqilg‘isi oldi-sotdisi shartnomasi orqali Rossiyadan pul olayotgan bo‘lishi mumkin va bu orqali Rim, Milan hamda Moskva “Shimoliy liga” partiyasining Yevropa parlamentiga saylovda ishtirokini moliyalashtirishni ko‘zlagan bo‘lishi mumkin, deyiladi. “Shimoliy liga” va Kreml o‘rtasidagi vositachilik aloqalari uchun 1991-yildan beri liganing a’zosi bo‘lib kelayotgan Janluka Salvini ma’suldir.
Jurnalistlar taxminiga ko‘ra, “Shimoliy liga” va Kreml o‘rtasidagi kelishuv 2018-yilning oktabr oylarida kelishilgan bo‘lishi mumkin. O‘sha paytda Salvini Moskvada rasmiy tashrif bilan bo‘lgan edi. O‘sha vaqtda Salvini hattoki Rossiyaga qo‘yilayotgan iqtisodiy jazo choralar be’maligini ham ta’kidlagan edi. Neft biznesiga aloqasi bo‘lmagan Janluka Salvini Moskvadagi Metropol mehmonxonasida “Rosneft” kompaniyasi bilan bir yil mobaynida 250 ming tonna dizel yoqilg‘isi yoxud 3 million dollar qiymatdagi mablag‘ni yetkazib berishga kelishib olgan, deb yozadi Le Figaro.
Moskva va Yevropa mamlakatlari munosabatlarini kuzatib boradigan siyosatchi va ekspert Anton Shexovsev so‘zlariga tayanar ekan, L’Espresso nashri “Roshamkorlik” 25 mamlakatda faoliyat yuritishini va ayni paytda “xorijiy mamlakatlarga ta’sir o‘tkazishga urinayotgan” Kremlning quroli bo‘lib xizmat qilmoqda. L’Espresso nashrining ma’lumotlariga ko‘ra, uning budjeti 2013-yilda 48 million yevrodan 2020-yilga kelib 228 million yevroga ko‘payishini keltiradi.
Masalaning bir qiziq jihati, mazkur maqola Italiya va Fransiya o‘rtasida munosabatlar sariq nimchalar ortidan sovuqlashgan paytga hamda Emmanuel Makronning “bizga xorij sarmoyasiga faoliyat yuritadigan partiyalar kerak emas, g‘ururlaringni yo‘qotmanglar” kabi chaqiriqlari fonida e’lon qilinmoqda.
Xalqaro tribunal: Bashar Asad ishi
Gaaga xalqaro tribunali da’volari tarixida ilk marotaba bir guruh huquq himoyachilari Bashar Asadga nisbatan da’vo arizasi berdi, deb yozadi Daily Telegraph.
Suriyadagi urush sabab Iordaniyaga qochib o‘tgan 28 nafar qochqin nomidan berilgan da’voda mamlakat rahbari Bashar Asadga nisbatan xalqaro jinoyat sudida ish qo‘zg‘atish so‘ralgan.
28 da’vogarning har biri Suriyada o‘lim xavfi bilan shaxsan ro‘baro‘ kelgan, havo hujumlariga uchragan va ommaviy qatag‘onlar guvohi bo‘lgan.
Suriya xalqaro jinoyat sudi nizomiga qo‘shilmagani bois u yerdagi tartib ustidan da’vo qo‘zgash ishini berib bo‘lmasdi. Ammo advokatlar guruhi Birma bilan sodir bo‘lgan bir holatdan o‘rnak oldi. Birma ham xalqaro jinoyat sudining a’zosi emas, biroq birmaliklar qochib o‘tgan Bangladesh xalqaro jinoyat sudning a’zosidir.
Birma holatidagi voqea sabab sud hukm chiqardi. Birmadagi rejimni aybdor sanash xalqaro sudning yurisdiksiyasida ekanligini va bunga sabab voqea xalqaro jinoyat sudining a’zosi hisoblangan davlat hududida yuz berganini e’lon qildi. Aynan shunday holat Suriya va Iordaniya masalasiga ham tadbiq etildi.
Jinoyat ishini ochishni so‘ragan advokatlardan biri gazetaga “odamlarni ommaviy ravishda deportatsiya qilganlar va bu ishda qatnashganlarni xalqaro sud prokurorlari tergov qilishini so‘radik. Agarda Suriya bosh qo‘mondoni Asad va Suriyadagi rasmiy shaxslardan birortasi xalqaro jinoyat sudi a’zosi bo‘lgan mamlakatga kelsa, ular aybdor deb topilgan holatda qamoqqa olinishi mumkin”, deb aytdi
Qamoqxonalarda saqlanayotgan ayol jurnalistlar
Press Gazette nashri “Chegara bilmas muxbirlar” ma’lumotlariga tayangan holda 8-mart — Xalqaro ayollar bayrami munosabati bilan 30 ga yaqin ayol jurnalist qamoqxonalarda og‘ir bir vaziyatda saqlanayotganini xabar qildi.
Xabarda Xitoy va Eron jurnalistlar eng ko‘p sud qilinadigan davlatlar sifatida keltiriladi. Shuningdek, ayni paytda Turkiya qamoqxonalarida to‘rt nafar ayol jurnalist jazo muddatini o‘tayotgani xabar qilinadi.
Bundan tashqari, Saudiya Arabistoni, Vyetnam, Misr, Bahrayn, Suriya va Nikaraguada ham ayol jurnalistlar so‘z erkinligi yo‘qligi tufayli jazo olyapti.
“Chegara bilmas muxbirlar” ayol jurnalistlar og‘ir sharoitdagi qamoxnolarda saqlanayotgani, qiynoqqa mahkum qilinayotganini ta’kidlar ekan, BMTdan ularni zudlik bilan ozod qilish borasida amaliy yordam berishni so‘radi.
Izoh (0)