«Дарё» жаҳон матбуотида охирги кунларда кўтарилган асосий мавзуларга тўхталиб ўтади.
Италян сиёсий партияларини руслар боқадими?
6 март санасида Le Figaro нашри қизиқарли бир мавзуни кўтариб чиқди. Мақола муаллифлари журналист Жованни Тициан ва Стефано Вержине «Шимол лигаси» консерватив партиясининг етакчиси ва партия харажатларини Кремль кўтараётган бўлиши мумкинлиги ҳақида мақола чоп этди.
Хусусан, мақолада партия фиктив дизель ёқилғиси олди-сотдиси шартномаси орқали Россиядан пул олаётган бўлиши мумкин ва бу орқали Рим, Милан ҳамда Москва «Шимолий лига» партиясининг Европа парламентига сайловда иштирокини молиялаштиришни кўзлаган бўлиши мумкин, дейилади. «Шимолий лига» ва Кремль ўртасидаги воситачилик алоқалари учун 1991 йилдан бери лиганинг аъзоси бўлиб келаётган Жанлука Сальвини маъсулдир.
Журналистлар тахминига кўра, «Шимолий лига» ва Кремль ўртасидаги келишув 2018 йилнинг октябрь ойларида келишилган бўлиши мумкин. Ўша пайтда Сальвини Москвада расмий ташриф билан бўлган эди. Ўша вақтда Сальвини ҳаттоки Россияга қўйилаётган иқтисодий жазо чоралар беъмалигини ҳам таъкидлаган эди. Нефть бизнесига алоқаси бўлмаган Жанлука Сальвини Москвадаги Metropol меҳмонхонасида «Роснефть» компанияси билан бир йил мобайнида 250 минг тонна дизель ёқилғиси ёхуд 3 миллион доллар қийматдаги маблағни етказиб беришга келишиб олган, деб ёзади Le Figaro.
Москва ва Европа мамлакатлари муносабатларини кузатиб борадиган сиёсатчи ва эксперт Антон Шеховцев сўзларига таянар экан, L’Espresso нашри «Росҳамкорлик» 25 мамлакатда фаолият юритишини ва айни пайтда «хорижий мамлакатларга таъсир ўтказишга уринаётган» Кремлнинг қуроли бўлиб хизмат қилмоқда. L’Espresso нашрининг маълумотларига кўра, унинг бюджети 2013 йилда 48 миллион евродан 2020 йилга келиб 228 миллион еврога кўпаяди.
Масаланинг бир қизиқ жиҳати, мазкур мақола Италия ва Франция ўртасида муносабатлар сариқ нимчалар ортидан совуқлашган пайтга ҳамда Эммануэль Макроннинг «бизга хориж сармоясига фаолият юритадиган партиялар керак эмас, ғурурларингни йўқотманглар» каби чақириқлари фонида эълон қилинмоқда.
Халқаро трибунал: Башар Асад иши
Гаага халқаро трибунали даъволари тарихида илк маротаба бир гуруҳ ҳуқуқ ҳимоячилари Башар Асадга нисбатан даъво аризаси берди, деб ёзади Daily Telegraph.
Суриядаги уруш сабаб Иорданияга қочиб ўтган 28 нафар қочқин номидан берилган даъвода мамлакат раҳбари Башар Асадга нисбатан халқаро жиноят судида иш қўзғатиш сўралган.
28 даъвогарнинг ҳар бири Сурияда ўлим хавфи билан шахсан рўбарў келган, ҳаво ҳужумларига учраган ва оммавий қатағонлар гувоҳи бўлган.
Сурия халқаро жиноят суди низомига қўшилмагани боис у ердаги тартиб устидан даъво қўзғаш ишини бериб бўлмасди. Аммо адвокатлар гуруҳи Бирма билан содир бўлган бир ҳолатдан ўрнак олди. Бирма ҳам халқаро жиноят судининг аъзоси эмас, бироқ бирмаликлар қочиб ўтган Бангладеш халқаро жиноят суднинг аъзосидир.
Бирма ҳолатидаги воқеа сабаб суд ҳукм чиқарди. Бирмадаги режимни айбдор санаш халқаро суднинг юрисдикциясида эканлигини ва бунга сабаб воқеа халқаро жиноят судининг аъзоси ҳисобланган давлат ҳудудида юз берганини эълон қилди. Айнан шундай ҳолат Сурия ва Иордания масаласига ҳам тадбиқ этилди.
Жиноят ишини очишни сўраган адвокатлардан бири газетага «одамларни оммавий равишда депортация қилганлар ва бу ишда қатнашганларни халқаро суд прокурорлари тергов қилишини сўрадик. Агарда Сурия бош қўмондони Асад ва Суриядаги расмий шахслардан бирортаси халқаро жиноят суди аъзоси бўлган мамлакатга келса, улар айбдор деб топилган ҳолатда қамоққа олиниши мумкин», деб айтди
Қамоқхоналарда сақланаётган аёл журналистлар
Press Gazette нашри «Чегара билмас мухбирлар» маълумотларига таянган ҳолда 8 март — Халқаро аёллар байрами муносабати билан 30 га яқин аёл журналист қамоқхоналарда оғир бир вазиятда сақланаётганини хабар қилди.
Хабарда Хитой ва Эрон журналистлар энг кўп суд қилинадиган давлатлар сифатида келтирилади. Шунингдек, айни пайтда Туркия қамоқхоналарида тўрт нафар аёл журналист жазо муддатини ўтаётгани хабар қилинади.
Бундан ташқари, Саудия Арабистони, Вьетнам, Миср, Баҳрайн, Сурия ва Никарагуада ҳам аёл журналистлар сўз эркинлиги йўқлиги туфайли жазо оляпти.
«Чегара билмас мухбирлар» аёл журналистлар оғир шароитдаги қамохноларда сақланаётгани, қийноққа маҳкум қилинаётганини таъкидлар экан, БМТдан уларни зудлик билан озод қилиш борасида амалий ёрдам беришни сўради.
Изоҳ (0)