Oliy Majlis yuqori palatasida qo‘mitalar va mahalliy hokimiyat vakillik organlari faoliyatini kuchaytirishga ko‘maklashuvchi komissiyaning majlislari bo‘lib o‘tdi. Ularda yalpi majlis muhokamasiga kiritilayotgan bir qator masalalar ko‘rib chiqildi, deya xabar beradi “Xalq so‘zi”.
Xususan, Senatning Budjet va iqtisodiy islohotlar masalalari qo‘mitasi majlisida “Sug‘urta faoliyati to‘g‘risida”gi qonunning Moliya vazirligi tomonidan ijro etilishini o‘rganish natijalari tahlil qilindi.
Bugungi kunda respublikada sohaning turli yo‘nalishlarida faoliyat ko‘rsatayotgan 30 ta sug‘urta kompaniyasi mavjud bo‘lib, ular tomonidan o‘tgan yil mobaynida to‘langan sug‘urta to‘lovlari hajmi 461,1 milliard so‘mni tashkil etib, 2017-yildagiga nisbatan 71 foiz oshgan. Sug‘urta kompaniyalarining investitsiyalari hajmi esa 2 trillion so‘mni tashkil qildi.
O‘rganish jarayonida mazkur hujjatning ijrosiga mas’ul vakolatli organ — Moliya vazirligi tomonidan bajarilishi majburiy bo‘lgan to‘lovga qobiliyatlilik normativlari hamda ularni aniqlash tartibiga oid zarur me’yorlarni ishlab chiqish kabi masalalarga sustkashlik bilan qaralayotgani ma’lum bo‘ldi.
Ayniqsa, sug‘urta bozori professional ishtirokchilari sug‘urta faoliyati to‘g‘risidagi qonun hujjatlariga rioya etishi va to‘lovga qobiliyatlilikning belgilangan me’yorlari hamda moliyaviy barqarorlikning boshqa talablari bajarilishini nazorat qilish kabi masalalar mas’ullar e’tiboridan chetda qolib ketyapti.
Buning oqibatida sug‘urtalanuvchilar yoki sug‘urta obyektlariga nisbatan noqonuniy talablar qo‘yish orqali ob’ektni sug‘urtalash holatlari yuzasidan haqli e’tirozlar bildirilmoqda. Mavjud muammolar o‘z vaqtida bartaraf etilmagani bois respublikada sug‘urta bozorining jadal rivojlanishi ta’minlanmagan, aholi va tadbirkorlik subyektlarining sug‘urta bozoriga nisbatan ishonchi past darajada qolmoqda.
Majlisda mamlakat sug‘urta tizimidagi mavjud muammolarni bartaraf etish, ushbu sohani yanada rivojlantirish borasida bir qator asosli taklif va tavsiyalar bildirildi.
Izoh (0)